๘. อริฏฺฐสิกฺขาปทวณฺณนา

๔๑๗. คหฏฺฐสฺสาปิ ภิกฺขุนีทูสกกมฺมํ โมกฺขนฺตรายิกเมว, ตสฺมา ตสฺส ปพฺพชฺชาปิ ปฏิกฺขิตฺตา. วิปากนฺตรายิกา อเหตุกตฺตา. ปุพฺเพ สญฺจิจฺจ อาปนฺนา สมฺมุฏฺฐา สุทฺธสญฺญิโน อนฺตรายิกา เอว. เสสาติ ชาติกา. รเสนาติ ภาเวน. อธิกุฏฺฏนฏฺเฐนาติ อธิกรณํ กตฺวา กุฏฺฏนฏฺเฐน ฉินฺทนฏฺเฐน. อสิสูนูปมา กุสลธมฺมจฺเฉทนฏฺเฐน. สตฺติสูลูปมา จิตฺตวิตุทนฏฺเฐนาติ โปราณา. อนาปตฺติปาฬิยํ ‘‘อาทิกมฺมิกสฺสา’’ติ มุขารุฬฺหวเสน ลิขิตํ.

อริฏฺฐสิกฺขาปทวณฺณนา นิฏฺฐิตา.