๓. ตติยวคฺโค

๑. มาตุคามสุตฺตวณฺณนา

๑๗๐. ยํ วิสภาควตฺถุ ปุริสสฺส จิตฺตํ ปริยาทาย ฐาตุํ สกฺโกตีติ วุจฺจติ, ตโต วิเสสโต ลาภสกฺกาโรว สตฺตานํ จิตฺตํ ปริยาทาย ฐาตุํ สกฺโกตีติ ทสฺเสนฺโต ภควา ‘‘น ตสฺส, ภิกฺขเว’’ติอาทิมโวจาติ ทสฺเสนฺโต ‘‘น ตสฺสา’’ติอาทิมาห.

มาตุคามสุตฺตวณฺณนา นิฏฺฐิตา.

๒. กลฺยาณีสุตฺตวณฺณนา

๑๗๑. ทุติยํ อุตฺตานเมว, ตสฺเสว อตฺถสฺส เกวลํ ชนปทกลฺยาณีวเสน วุตฺตํ.

กลฺยาณีสุตฺตวณฺณนา นิฏฺฐิตา.

๓-๖. เอกปุตฺตกสุตฺตาทิวณฺณนา

๑๗๒-๑๗๕. สทฺธาติ อริยมคฺเคน อาคตสทฺธา อธิปฺเปตาติ อาห ‘‘โสตาปนฺนา’’ติ.

เอกปุตฺตกสุตฺตาทิวณฺณนา นิฏฺฐิตา.

๗. ตติยสมณพฺราหฺมณสุตฺตวณฺณนา

๑๗๖. เอวมาทีติ อาทิ-สทฺเทน พาหุสจฺจสํวรสีลาทีนํ สงฺคโห ทฏฺฐพฺโพ. ลาภสกฺการสฺส สมุทยํ อุปฺปตฺติการณํ สมุทยสจฺจวเสน ทุกฺขสจฺจสฺส อุปฺปตฺติเหตุตาวเสน.

ตติยสมณพฺราหฺมณสุตฺตวณฺณนา นิฏฺฐิตา.

๘. ฉวิสุตฺตวณฺณนา

๑๗๗. ลาภสกฺการสิโลโก นรกาทีสุ นิพฺพตฺเตนฺโตติ อิทํ ตนฺนิสฺสยํ กิเลสคณํ สนฺธายาห. นิพฺพตฺเตนฺโตติ นิพฺพตฺตาเปนฺโต. อิมํ มนุสฺสอตฺตภาวํ นาเสติ มนุสฺสตฺตํ ปุน นิพฺพตฺติตุํ อปฺปทานวเสน. ตสฺมาติ ทุคฺคตินิพฺพตฺตาปนโต อิธ มรณทุกฺขาวหนโต จ.

ฉวิสุตฺตวณฺณนา นิฏฺฐิตา.

๙. รชฺชุสุตฺตวณฺณนา

๑๗๘. ขรา ผรุสา ฉวิอาทีนิ ฉินฺทเน สมตฺถา.

รชฺชุสุตฺตวณฺณนา นิฏฺฐิตา.

๑๐. ภิกฺขุสุตฺตวณฺณนา

๑๗๙. ตํ สนฺธายาติ ทิฏฺฐธมฺมสุขวิหารสฺส โอกาสาภาวํ สนฺธาย.

ภิกฺขุสุตฺตวณฺณนา นิฏฺฐิตา.

ตติยวคฺควณฺณนา นิฏฺฐิตา.