๒๗. ราชภฏวตฺถุกถา

๙๐. อุจฺจินถาติ เอตฺถ จิธาตุยา วฑฺฒนตฺถํ ทสฺเสนฺโต อาห ‘‘วฑฺเฒถา’’ติ. โสตาปนฺนตฺตาติ พิมฺพิสารรญฺโญ =๐๘ โสตาปนฺนภาวโต. ฆาเตถาติ ชีวิตา โวโรเปถ. หนถาติ ปหรถ. ตโตติ อุปชฺฌายโต. อาจริโย เสฏฺโฐติ สมฺพนฺโธ. ตโตติ อาจริยโต. อิทนฺติ วจนํ, อาคตนฺติ สมฺพนฺโธ. อาหํสุ โวหาริกา มหามตฺตา มุสาวาเทนาติ โยชนา. อมจฺโจติ สพฺพราชกิจฺเจสุ อมา สห รญฺญา ภวตีติ อมจฺโจ. อมาสทฺโท สหตฺเถ นิปาโต. ‘‘อมา’’ติ นิปาตโต ภวตฺเถ อจฺจปจฺจโย (โมคฺคลฺลาเน ๔.๒๓ สุตฺเต). มหามตฺโตติ มหนฺโต มตฺตา อิสฺสริยา เอตสฺสาติ มหามตฺโต. มตฺตาสทฺโท เหตฺถ อิสฺสริยวาจโก. เสวโกติ ราชานํ เสวติ ภชตีติ เสวโก. ภตฺตเวตนภโฏติ ภตฺตเวตนานมตฺถาย ภโฏ. ตสฺสาติ ราชภฏสฺส. ปุตฺตนตฺตภาตุกาทโยติอาทิสทฺเทน ภาคิเนยฺยาทโย สงฺคณฺหาติ. โย ปนาติ ราชภโฏ ปน. นิยฺยาเตตีติ อปฺเปติ. ตํ ฐานนฺติ ตํ ราชภฏฏฺฐานํ. เยน วาติ กมฺมกาเรน วา. ยํกมฺมการณาติ ยสฺส กมฺมสฺส การณา. โย วาติ ราชภโฏ วา. ปพฺพชสฺสูติ ปพฺพาเชหิ.