๙. นวมสิกฺขาปทํ

๘๗๕. นวเม อภิสเปยฺยาติ เอตฺถ สปธาตุสฺส อกฺโกสนตฺถํ อนฺโตกตฺวา กรธาตุยา อตฺถํ ทสฺเสนฺโต อาห ‘‘สปถํ กเรยฺยา’’ติ. นิรเย นิพฺพตฺตามฺหีติ อหํ นิรเย นิพฺพตฺตา อมฺหีติ โยชนา. นิรเย นิพฺพตฺตตูติ เอสา ภิกฺขุนี นิรเย นิพฺพตฺตตูติ โยชนา. อีทิสา โหตูติ มม สทิสา โหตูติ อตฺโถ. กาณาติ เอกกฺขิกาณา, ทฺวกฺขิกาณา วา. กุณีติ หตฺถปาทาทิวงฺกา.

๘๗๘. เอทิสาติ วิรูปาทิชาติกา. วิรมสฺสูติ วิรมาหิ. อทฺธาติ ธุวนฺติ. นวมํ.