๒. อนฺธการวคฺโค

๑. ปฐมสิกฺขาปท-อตฺถโยชนา

๘๓๙. อนฺธการวคฺคสฺส ปฐเม อปฺปทีเปติ อุปลกฺขณวเสน วุตฺตตฺตา อญฺเญปิ อาโลกา คเหตพฺพาติ ทสฺเสนฺโต อาห ‘‘ปทีปจนฺทสูริยอคฺคีสู’’ติอาทิ. อสฺสาติ ‘‘อปฺปทีเป’’ติปทสฺส.

๘๔๑. นรโหอสฺสาทาเปกฺขา หุตฺวา จ รสฺสาทโต อญฺญวิหิตาว หุตฺวา จาติ โยชนา. อิมินา ‘‘สนฺติฏฺฐติ วา สลฺลปติ วา’’ติ ปเท กิริยาวิเสสนภาวํ ทสฺเสติ. ทาเนน วา นิมิตฺตภูเตน, ปูชาย วา นิมิตฺตภูตาย มนฺเตตีติ โยชนาติ. ปฐมํ.

๒. ทุติยสิกฺขาปทํ

๘๔๒. ทุติเย อิทเมว ปทํ นานนฺติ สมฺพนฺโธติ. ทุติยํ.

๓. ตติยสิกฺขาปทํ

๘๔๖. ตติเย ‘‘อิทเมวา’’ติ ปทํ อนุวตฺเตตพฺพํ. ตาทิสเมวาติ ปฐมสทิสเมวาติ อตฺโถติ. ตติยํ.

๔. จตุตฺถสิกฺขาปทํ

๘๕๐. จตุตฺเถ กณฺณสฺส สมีปํ นิกณฺณํ, ตเมว นิกณฺณิกนฺติ วุตฺเต กณฺณมูลนฺติ อาห ‘‘กณฺณมูลํ วุจฺจตี’’ติ. ‘‘กณฺณมูเล’’ติ อิมินา ‘‘นิกณฺณิก’’นฺติ เอตฺถ ภุมฺมตฺเถ อุปโยควจนนฺติ ทสฺเสติ. อาหรณตฺถายาติ อาหราปนตฺถายาติ. จตุตฺถํ.

๕. ปญฺจมสิกฺขาปทํ

๘๕๔. ปญฺจเม เตสนฺติ ฆรสามิกานํ. ฆรมฺปีติ น เกวลํ อาสนเมว, ฆรมฺปิ โสเธมาติ อตฺโถ. ตโตติ ปริวิตกฺกนโต, ปรนฺติ สมฺพนฺโธ.

๘๕๘. โจรา วา อุฏฺฐิตา โหนฺตีติ โยชนาติ. ปญฺจมํ.

๖. ฉฏฺฐสิกฺขาปทํ

๘๖๐. ฉฏฺเฐ อภินิสีเทยฺยาติ เอตฺถ อภิสทฺโท อุปสคฺคมตฺโตวาติ ทสฺเสนฺโต อาห ‘‘นิสีเทยฺยา’’ติ. เอเสว นโย อภินิปชฺเชยฺยาติ เอตฺถาปิ. เทฺว อาปตฺติโยติ สมฺพนฺโธติ. ฉฏฺฐํ.

๗. สตฺตมสิกฺขาปทํ

๘๖๔. สตฺตเม สพฺพนฺติ สกลํ วตฺตพฺพวจนนฺติ. สตฺตมํ.

๘. อฏฺฐมสิกฺขาปทํ

๘๖๙. อฏฺฐเม อนุตฺตานวจนํ นตฺถีติ. อฏฺฐมํ.

๙. นวมสิกฺขาปทํ

๘๗๕. นวเม อภิสเปยฺยาติ เอตฺถ สปธาตุสฺส อกฺโกสนตฺถํ อนฺโตกตฺวา กรธาตุยา อตฺถํ ทสฺเสนฺโต อาห ‘‘สปถํ กเรยฺยา’’ติ. นิรเย นิพฺพตฺตามฺหีติ อหํ นิรเย นิพฺพตฺตา อมฺหีติ โยชนา. นิรเย นิพฺพตฺตตูติ เอสา ภิกฺขุนี นิรเย นิพฺพตฺตตูติ โยชนา. อีทิสา โหตูติ มม สทิสา โหตูติ อตฺโถ. กาณาติ เอกกฺขิกาณา, ทฺวกฺขิกาณา วา. กุณีติ หตฺถปาทาทิวงฺกา.

๘๗๘. เอทิสาติ วิรูปาทิชาติกา. วิรมสฺสูติ วิรมาหิ. อทฺธาติ ธุวนฺติ. นวมํ.

๑๐. ทสมสิกฺขาปทํ

๘๗๙. ทสเม อนุตฺตานฏฺฐานํ นตฺถีติ. ทสมํ.

อนฺธการวคฺโค ทุติโย.