๔. จตุตฺถสิกฺขาปทํ

๘๕๐. จตุตฺเถ กณฺณสฺส สมีปํ นิกณฺณํ, ตเมว นิกณฺณิกนฺติ วุตฺเต กณฺณมูลนฺติ อาห ‘‘กณฺณมูลํ วุจฺจตี’’ติ. ‘‘กณฺณมูเล’’ติ อิมินา ‘‘นิกณฺณิก’’นฺติ เอตฺถ ภุมฺมตฺเถ อุปโยควจนนฺติ ทสฺเสติ. อาหรณตฺถายาติ อาหราปนตฺถายาติ. จตุตฺถํ.

๕. ปญฺจมสิกฺขาปทํ

๘๕๔. ปญฺจเม เตสนฺติ ฆรสามิกานํ. ฆรมฺปีติ น เกวลํ อาสนเมว, ฆรมฺปิ โสเธมาติ อตฺโถ. ตโตติ ปริวิตกฺกนโต, ปรนฺติ สมฺพนฺโธ.

๘๕๘. โจรา วา อุฏฺฐิตา โหนฺตีติ โยชนาติ. ปญฺจมํ.