๔. จตุตฺถสิกฺขาปทํ

๘๐๖. จตุตฺเถ รญฺโญ โอโรธา ราโชโรธา, ปุราเณ ราโชโรธา ปุราณราโชโรธาติ วจนตฺถํ ทสฺเสนฺโต อาห ‘‘ปุราเณ’’ติอาทิ. ‘‘คิหิภาเว’’ติ อิมินา ปุราเณติ เอตฺถ ณปจฺจยสฺส สรูปํ ทสฺเสติ. จิราจิรนฺติ นิปาตปฏิรูปกํ. เตน วุตฺตํ ‘‘จิเรน จิเรนา’’ติ. ‘‘สกฺโกถา’’ติ อิมินา กถํ ตุเมฺห ราคจิตฺตํ ปฏิหนิตฺวา อตฺตานํ ธาเรถ ธาเรตุํ สกฺโกถาติ อตฺถํ ทสฺเสติ. อนาโรจิเตปีติ ภูตโต อนาโรจิเตปิ.

๘๐๗. ชตุนาติ ลาขาย. ปฏฺฐทณฺฑเกติ ปฏุภาเวน ฐาติ ปวตฺตตีติ ปฏฺโฐ, โสเยว ทณฺโฑ ปฏฺฐทณฺโฑ, ตสฺส ปเวสนํ ปฏฺฐทณฺฑกํ, ตสฺมึ นิมิตฺตภูเต. เอตนฺติ ‘‘ชตุมฏฺฐเก’’ติ เอตํ วจนนฺติ. จตุตฺถํ.