๗. คพฺภินิวคฺโค

๑. ปฐมสิกฺขาปท-อตฺถโยชนา

๑๐๖๙. คพฺภินิวคฺคสฺส ปฐเม กุจฺฉึ ปวิฏฺโฐ สตฺโต เอติสฺสา อตฺถีติ กุจฺฉิปวิฏฺฐสตฺตา. ‘‘กุจฺฉิ’’นฺติปิ ปาโฐ. อิมินา คพฺภินีติ เอตฺถ คพฺภสทฺโท กุจฺฉิฏฺฐสตฺตวาจโกติ ทสฺเสติ. คพฺภสทฺโท (อภิธานปฺปทีปิกายํ ๙๔๔ คาถายํ) หิ กุจฺฉิฏฺฐสตฺเต จ กุจฺฉิมฺหิ จ โอวรเก จ วตฺตตีติ. ปฐมํ.

๒. ทุติยสิกฺขาปทํ

๑๐๗๓. ทุติเย ถญฺญํ ปิวตีติ ปายนฺโต, ทารโก, โส เอติสฺสา อตฺถีติ ปายนฺตีติ ทสฺเสนฺโต อาห ‘‘ถญฺญํ ปายมานิ’’นฺติ. ทุติยํ.

๓. ตติยสิกฺขาปทํ

๑๐๗๗. ตติเย นิตฺถริสฺสตีติ วฏฺฏทุกฺขโต นิตฺถริสฺสติ.

๑๐๗๙. ปาณาติปาตา เวรมณินฺติ เอตฺถ ปาณาติปาตา วิรมติ อิมายาติ เวรมณีติ อตฺเถน สิกฺขาปทํ เวรมณิ นามาติ อาห ‘‘ปาณาติปาตา เวรมณิสิกฺขาปท’’นฺติ. ยํ ตํ สิกฺขาปทนฺติ สมฺพนฺโธ. สพฺพตฺถาติ ‘‘อทินฺนาทานา เวรมณิ’’นฺติอาทีสุ สพฺเพสุ วาเกฺยสุ. ปพฺพชิตาย สามเณริยาติ สมฺพนฺโธ. เอตาสูติ ฉสุ สิกฺขาสูติ. ตติยํ.

๔. จตุตฺถสิกฺขาปทํ

๑๐๘๔. จตุตฺเถ ‘‘วุฏฺฐานสมฺมุตี’’ติ ปทํ ‘‘โหตี’’ติ ปเท กตฺตา, ‘‘ทาตพฺพาเยวา’’ติ ปเท กมฺมนฺติ. จตุตฺถํ.

๕-๙. ปญฺจมาทิสิกฺขาปทํ

๑๐๙๕. ปญฺจมาทีสุ นวมปริโยสาเนสุ สิกฺขาปเทสุ อนุตฺตานฏฺฐานํ นตฺถีติ. ปญฺจมฉฏฺฐสตฺตมฏฺฐมนวมานิ.

๑๐. ทสมสิกฺขาปทํ

๑๑๑๖. ทสเม วูปกาเสยฺยาติ เอตฺถ กาสธาตุยา คตฺยตฺถํ ทสฺเสนฺโต อาห ‘‘คจฺเฉยฺยา’’ติ. ทสมํ.

คพฺภินิวคฺโค สตฺตโม.