๗. นิกฺกฑฺฒนสิกฺขาปทํ

๑๒๖. สตฺตเม เย ปาสาทา วา ยานิ วา จตุสฺสาลานีติ โยชนา. จตสฺโส ภูมิโย เอเตสนฺติ จตุภูมกา. เอวํ ปญฺจภูมกา. โกฏฺฐกานีติ ทฺวารโกฏฺฐกานิ. ‘‘ปาสาทา’’ติปทมเปกฺขิย วุตฺตํ ‘‘เย’’ติปทํ, ‘‘จตุสฺสาลานี’’ติปเท อเปกฺขิเต ‘‘ยานี’’ติ ลิงฺควิปลฺลาโส โหติ. เสนาสเนสุ เอเกน ปโยเคน พหุเก ทฺวาเร ภิกฺขุํ อติกฺกาเมตีติ สมฺพนฺโธ. นานาปโยเคหิ นานาทฺวาเร ภิกฺขุํ อติกฺกาเมนฺตสฺสาติ โยชนา. ‘‘ทฺวารคณนายา’’ติอิมินา ปโยคคณนายาติปิ อตฺถํ ญาเปติ อตฺถโต ปากฏตฺตา. อนามสิตฺวาติ อฉุปิตฺวา.

เอตฺตกานีติ เอตปมาณานิ. ตสฺสาติ นิกฺกฑฺฒิยมานสฺส ภิกฺขุสฺส. คาฬฺหนฺติ ทฬฺหํ.

๑๒๗. อิธาปีติ อิมสฺมิมฺปิ สิกฺขาปเท. ปิสทฺโท ปุริมสิกฺขาปทาเปกฺโข. สพฺพตฺถาติ สพฺเพสุ สิกฺขาปเทสุ. ยตฺราติ ยสฺมึ สิกฺขาปเท.

๑๒๘. โสติ ภณฺฑนการกกลหการโก ภิกฺขุ. หีติ สจฺจํ, ยสฺมา วา. ปกฺขนฺติ อตฺตโน ปกฺขํ. นิกฺกฑฺฒิยมานปุคฺคลปกฺเข อุมฺมตฺตกสฺส นิกฺกฑฺฒติ วา นิกฺกฑฺฒาเปติ วาติ สมฺพนฺธิตพฺพํ. นิกฺกฑฺฒกปุคฺคลปกฺเข อุมฺมตฺตกสฺส อนาปตฺตีติ สมฺพนฺธิตพฺพนฺติ. สตฺตมํ.