๖. ถาลกนิทฺเทสวณฺณนา

๗๑-๒. ทารุ …เป… เวฬุริยามยา อกปฺปิยา, ผลิกากาจกํสชา ถาลกา คิหิสนฺตกา สงฺฆิกา จ กปฺปิยา, ตุมฺพฆฏิชา ตาวกาลิกา กปฺปิยาติ สมฺพนฺโธ. กปฺปนฺติ ปริกปฺปนฺติ อวิโรธิภาเวเนวาติ กปฺปา, ตถา กปฺปิยา. น กปฺปา อกปฺปา. สงฺฆสฺส อิเม สงฺฆิกา. ตาว-สทฺโท อวธิมฺหิ. ตาว โภชนาวธิภูโต กาโล เอตาสนฺติ ตาวกาลิกา, ภุญฺชิตฺวา ฉฑฺเฑตพฺพา, น ปริหริตพฺพาติ อธิปฺปาโย.

ถาลกนิทฺเทสวณฺณนา นิฏฺฐิตา.