๒๗. อสํวาสนิทฺเทสวณฺณนา

๑๙๘. อุกฺขิตฺโตติ กมฺมนานาสํวาสกสงฺขาโต อาปตฺติยา อทสฺสเน, อปฺปฏิกมฺเม, ปาปิกาย ทิฏฺฐิยา อปฺปฏินิสฺสคฺเค อุกฺขิตฺตโก. อนุปสมฺปนฺโนติ สิกฺขมานสามเณรสามเณริสิกฺขาปจฺจกฺขาตสงฺขาโต อนุปสมฺปนฺโน. ฉินฺนมูลโกติ อนฺติมวตฺถุอชฺฌาปนฺโน. อุกฺขิตฺตเกสุ ‘‘ธมฺมวาทิโน เอเต’’ติ อุปฺปนฺนาย ลทฺธิยา นานาภูโต สํวาโส เอตสฺสาติ นานาสํวาโส, อุกฺขิตฺตานุวตฺตกสงฺขาโต ลทฺธินานาสํวาสโก. สีมโต นิคฺคตา นิสฺสีมา, สีมนฺตริกา พหิสีมา จ, ตตฺถ หตฺถปาเส เจปิ ฐิโต, สีมานานาสํวาสโก นิสฺสีมฏฺฐิโต. เวหายเส อากาเส ฐิโต เวหายสณฺฐิโต พินฺทาคเมน. ตตฺถ ‘‘นานาสํวาโส จา’’ติอาทินา สมาหารทฺวนฺเทปิ กฺวจิ นปุํสกลิงฺคํ พฺยภิจรตีติ นปุํสกตฺตาภาโว ยถา ‘‘มคฺคามคฺโค’’ติ. เอกกมฺมํ เอกุทฺเทโส สมสิกฺขตาติ อยํ ติวิโธปิ สํวาโส นาม. โส เยสํ นตฺถิ, เต อสํวาสา. เอเต หตฺถปาสโต พหิกรณวเสน วชฺเชตพฺพา. เอเตสุ หิ ติวิเธ อุกฺขิตฺตเก สติ อุโปสถาทิกํ กมฺมํ กโรนฺตสฺส ปาจิตฺติยํ, อิตเรสุ ทุกฺกฏนฺติ.

อสํวาสนิทฺเทสวณฺณนา นิฏฺฐิตา.