๒๔. อญฺชนีนิทฺเทสวณฺณนา

๑๘๒. วฏฺฏา วา อฏฺฐโสฬสํสา วา มฏฺฐา อญฺชนี วฏฺฏตีติ โยชนา. อฏฺฐ จ โสฬส จ อํสา โกณา ยสฺสา สาติ วิคฺคโห. โสฬสํสปเทสวิภตฺตาย อฏฺฐํสาสุติยา อฏฺฐํสปเทสวิภตฺตา จตุรํสาปิ สามตฺถิยา คยฺหตีติ ญาตพฺพํ. ‘‘อุชุกเมว ปน จตุรํสาวา’’ติ หิ อฏฺฐกถายํ (ปารา. อฏฺฐ. ๑.๘๕) วุตฺตํ. อญฺชนีติ อญฺชนนาฬิ. มูเล ติสฺโสปิ เลขา วฏฺฏนฺตีติ โยชนา. มูเลติ พุนฺเท, เหฏฺฐโตติ วุตฺตํ โหติ. เลขาติ วฏฺฏเลขา. พนฺธิตุํ คีวายํ เอกา เอว เลขา วฏฺฏตีติ สมฺพนฺโธ. พนฺธิตุนฺติ ปิธานพนฺธนตฺถํ.

๑๘๓. ยํ กิญฺจิ รูปนฺติ อิตฺถิรูปาทิ ยํ กิญฺจิ รูปํ. มาลาทิกมฺมนฺติ มาลากมฺมํ ลตากมฺมํ. อฑฺฒจนฺทาทีติ เอตฺถ อาทิ-สทฺเทน อคฺฆิยาทิกํ คหิตํ. เอตฺถาติ อญฺชนิยํ.

๑๘๔. ถวิกาติ อญฺชนิถวิกา. สิปาฏีติ ขุรสิปาฏิกา. สลากาปิ อจิตฺตกา ลพฺภาติ สมฺพนฺโธ. สลากาติ อญฺชนิสลากา. นตฺถิ จิตฺตเมติสฺสาติ อจิตฺตกา. ตาทิสํ ปน ลภิตฺวา อุปาหนาโย วิย นาเสตฺวา ปริภุญฺชิตพฺพํ.

๑๘๕. อฏฺฐิ-สทฺเทน มนุสฺสฏฺฐึ ฐเปตฺวา ยํ กิญฺจิ อฏฺฐิ คหิตํ.

๑๘๖. ธูมเนตฺตาติ ธูมนาฬิกา, นิสฺส อา-การาเทสวเสน วุตฺตํ. สตฺถกทณฺฑานีติ สตฺถทณฺฑา. นตฺถุํ เทนฺติ เอตายาติ นตฺถุทานา. อนิยเมน หิ นทาทิโต วา อี. เตหิ สงฺขนาภิอาทีหิ นิพฺพตฺตา ตมฺมยา.

อญฺชนีนิทฺเทสวณฺณนา นิฏฺฐิตา.