๑๙. นฺหานกปฺปนิทฺเทสวณฺณนา

๑๖๘. กปฺปนํ กปฺปิยตา กปฺโป, นฺหาเน กปฺโป นฺหานกปฺโป. นวโก เถรานํ ปุรโต อุปริ วา น จ นฺหาเยยฺยาติ สมฺพนฺโธ. น จาติ นเยว. ปุรโตติ อภิมุเข. อุปรีติ นทิยา อุปริ.

๑๖๙-๑๗๑. กุฏฺฏตฺถมฺภตรุฏฺฏาเน กายํ น ฆํสเยติ สมฺพนฺโธ. ตตฺถ กุฏฺฏํ นาม อิฏฺฐกทารุสิลาภิตฺติ. ถมฺโภ นาม นหานติตฺเถ นิขนิตฺวา ฐปิโต. ตรูติ รุกฺโข. อฏฺฏานํ นาม ตจฺเฉตฺวา อฏฺฐปทากาเรน ราชิโย ฉินฺทิตฺวา นหานติตฺเถ นิขาตผลกํ. คนฺธพฺพหตฺเถน วา…เป… มลฺลเกน วา กายํ สรีเรน วา อญฺญมญฺญํ น ฆํสเยติ สมฺพนฺโธ. คนฺธพฺพหตฺเถนาติ ทารุมยหตฺเถน. กุรุวินฺทกสุตฺติยาติ กุรุวินฺทกปาสาณจุณฺณานิ ลาขาย พนฺธิตฺวา กตคุฬิกาวลิยา สุตฺเตน อาวุณิตสุตฺติยา. มลฺลเกนาติ มกรทนฺตเก ฉินฺทิตฺวา ปทุมกณฺณิกสณฺฐาเนน กตมลฺลเกน. สรีเรนาติ อตฺตโน กาเยน. อญฺญมญฺญสฺส อญฺญมญฺญํ กิริยากรณสงฺขาเต กิริยาพฺยภิหาเร ทฺวิตฺตํ. กปาล…เป… ปุถุปาณิ จ สพฺเพสํ วฏฺฏตีติ สมฺพนฺโธ. กปาลญฺจ อิฏฺฐกา จ, ตาสํ ขณฺฑานิ. ปุถุปาณีติ ปุถุ นานา ปาณิ ปุถุปาณิ, หตฺถปริกมฺมํ รุฬฺหีวเสน. สพฺเพสนฺติ คิลานาคิลานานํ. คิลานสฺส อกตมลฺลกํ วฏฺฏตีติ สมฺพนฺโธ. อกตมลฺลกํ นาม กตมลฺลกวิปรีตํ. เผณํ นาม สมุทฺทเผณนฺติ.

นฺหานกปฺปนิทฺเทสวณฺณนา นิฏฺฐิตา.