๑๘. นคฺคนิทฺเทสวณฺณนา

๑๖๖. ‘‘วเช’’ติอาทีสุ น-สทฺโท สมฺพนฺธิตพฺโพ. ตตฺถ ปน ยถานุรูปโภชนาทิกํ กมฺมวจนํ อชฺฌาหริตฺวา ‘‘โภชนํ น ภุญฺเช’’ติอาทินา อตฺโถ เวทิตพฺโพ.

๑๖๗. น กเรติ หตฺถกมฺมาทิกํ ปริกมฺมํ สยมฺปิ น กเรยฺยาติ อตฺโถ. ปฏิจฺฉาทีสูติ นิทฺธารเณ ภุมฺมํ, ชนฺตาฆรุทกวตฺถปฺปฏิจฺฉาทีนํ มชฺเฌติ อตฺโถ. ปริกมฺเม ทุเว กปฺปิยาติ สมฺพนฺโธ. ปริกมฺเมติ ชนฺตาฆเร อุทเกปิ อุปชฺฌายาทีนํ กตฺตพฺพปริกมฺมวิสเย, น อภิวาทนาทีสุ. ทุเวติ ชนฺตาฆรอุทกปฺปฏิจฺฉาทโย. ฉาเทนฺติ เอตายาติ ฉาทิ, วตฺถสฺส ฉาทิ วตฺถจฺฉาทิ. สพฺพตฺถาติ สพฺพกมฺเมสูติ.

นคฺคนิทฺเทสวณฺณนา นิฏฺฐิตา.