๒๔. อญฺชนีนิทฺเทสวณฺณนา

๑๘๒. วฏฺฏา วา อฏฺฐโสฬสํสา วา มฏฺฐา ปุปฺผลตาทีหิ อจิตฺตกา อญฺชนี วฏฺฏตีติ อตฺโถ. ติสฺโสปิ วฏฺฏนฺติ, เอกาย วา ทฺวีสุ วา กถา เอว นตฺถีติ อธิปฺปาโย. เลขาติ วฏฺฏเลขา. พนฺธิตุนฺติ ปิธานกพนฺธนตฺถํ.

๑๘๓. รูปนฺติ สกุณรูปาทิ. ยทิ จ เอทิสํ อญฺเญหิ กตํ ลภติ, ฆํสิตฺวา วา ฉินฺทิตฺวา วา ยถา วา น ปญฺญายติ, ตถา สุตฺเตน เวเฐตฺวา วฬญฺเชตพฺพํ.

๑๘๔. ถวิกาติ อญฺชนิถวิกา. อญฺชนิสลากาปิ ลพฺภตีติ สมฺพนฺโธ.

๑๘๕-๖. อฏฺฐีติ (มหาว. ๒๖๖; มหาว. อฏฺฐ. ๒๖๔) มนุสฺสฏฺฐึ ฐเปตฺวา อวเสสฏฺฐิ. วิสาณทนฺเตสุ อกปฺปิยํ นาม นตฺถิ. อามลกกกฺกาทีหิ กตา ผลมยา. ตมฺมยาติ อิธ วุตฺเตเหว นิพฺพตฺตา. อญฺชนีวินิจฺฉโย.

อญฺชนีนิทฺเทสวณฺณนา นิฏฺฐิตา.