๑๗. อาปุจฺฉกรณนิทฺเทสวณฺณนา

๑๖๑. เถเรนาติ สงฺฆตฺเถเรน.

๑๖๒. ตตฺถ ตตฺถ สนฺนิปติตานํ สพฺเพสํ วุฑฺโฒ วุฑฺฒตโร, ตสฺมึ วุฑฺฒตราคเม ปุน อาปุจฺฉนํ นตฺถิ. ภตฺตคฺเค จานุโมทโตติ เอตฺถ ทานปตินา ยาจิเตน ทหเรน วุฑฺเฒน อนาปุจฺฉิตฺวา กเถตุํ วฏฺฏตีติ วทนฺติ.

๑๖๓. เอกวิหารเกติ เอโกวรเก วุฑฺเฒน วสนฺโต อนาปุจฺฉา น สชฺฌาเยยฺยาติ อตฺโถ. อุทฺเทสํ ปริปุจฺฉญฺจ โน ทเทติ อุทฺเทสํ วา ปริปุจฺฉํ วา โน ทเทยฺย.

๑๖๔. น วิวเรยฺย น ถเกยฺย จาติ สมฺพนฺโธ. ทฺวารํ นาม มหาวฬญฺชํ, ตตฺถ อาปุจฺฉนกิจฺจํ นตฺถิ.

๑๖๕. วุฑฺเฒน จงฺกเม จงฺกมนฺโตปิ เยน วุฑฺโฒ, เตน ปริวตฺตเยติ สมฺพนฺโธ. อาปุจฺฉกรณวินิจฺฉโย.

อาปุจฺฉกรณนิทฺเทสวณฺณนา นิฏฺฐิตา.