๘. กาลิกนิทฺเทโส

กาลิกา จาติ –

๘๔. ปฏิคฺคหิตา จตฺตาโร, กาลิกา ยาวกาลิกํ;

ยามกาลิกํ สตฺตาห-กาลิกํ ยาวชีวิกํ.

๘๕. ปิฏฺฐํ มูลํ ผลํ ขชฺชํ, โครโส ธญฺญโภชนํ;

ยาคุสูปปฺปภุตโย, โหนฺเตเต ยาวกาลิกา.

๘๖. มธุมุทฺทิกสาลูก-โจจโมจมฺพชมฺพุชํ;

ผารุสํ นคฺคิสนฺตตฺตํ, ปานกํ ยามกาลิกํ.

๘๗. สานุโลมานิ ธญฺญานิ, ฐเปตฺวา ผลโช รโส;

มธูกปุปฺผมญฺญตฺร, สพฺโพ ปุปฺผรโสปิ จ.

๘๘. สพฺพปตฺตรโส เจว, ฐเปตฺวา ปกฺกฑากชํ;

สีโตทมทฺทิโตทิจฺจ-ปาโก วา ยามกาลิโก.

๘๙. สปฺปิโนนีตเตลานิ, มธุผาณิตเมว จ;

สตฺตาหกาลิกา สปฺปิ, เยสํ มํสมวาริตํ.

๙๐. เตลํ ติลวเสรณฺฑ-มธุสาสปสมฺภวํ;

ขุทฺทาภมรมธุกริ-มกฺขิกาหิ กตํ มธุ;

รสาทิอุจฺฉุวิกติ, ปกฺกาปกฺกา จ ผาณิตํ.

๙๑. สวตฺถุปกฺกา สามํ วา, วสา กาเล อมานุสา;

อญฺเญสํ น ปเจ วตฺถุํ, ยาวกาลิกวตฺถุนํ.

๙๒. หลิทฺทึ สิงฺคิเวรญฺจ, วจตฺตํ ลสุณํ วจา;

อุสีรํ ภทฺทมุตฺตญฺจาติวิสา กฏุโรหิณี;

ปญฺจมูลาทิกญฺจาปิ, มูลํ ตํ ยาวชีวิกํ.

๙๓. พิฬงฺคํ มริจํ โคฏฺฐ-ผลํ ปิปฺผลิ ราชิกา;

ติผเลรณฺฑกาทีนํ, ผลํ ตํ ยาวชีวิกํ.

๙๔. กปฺปาสนิมฺพกุฏชปโฏลสุลสาทินํ;

สูเปยฺยปณฺณํ วชฺเชตฺวา, ปณฺณํ ตํ ยาวชีวิกํ.

๙๕. ฐเปตฺวา อุจฺฉุนิยฺยาสํ,

สรสํ อุจฺฉุชํ ตจํ;

นิยฺยาโส จ ตโจ สพฺโพ,

โลณํ โลหํ สิลา ตถา.

๙๖. สุทฺธสิตฺถญฺจ เสวาโล, ยญฺจ กิญฺจิ สุฌาปิตํ;

วิกฏาทิปฺปเภทญฺจ, ญาตพฺพํ ยาวชีวิกํ.

๙๗. มูลํ สารํ ตโจ เผคฺคุ, ปณฺณํ ปุปฺผํ ผลํ ลตา;

อาหารตฺถ มสาเธนฺตํ, สพฺพํ ตํ ยาวชีวิกํ.

๙๘. สพฺพกาลิกสมฺโภโค, กาเล สพฺพสฺส กปฺปติ;

สติ ปจฺจเย วิกาเล, กปฺปเต กาลิกตฺตยํ.

๙๙. กาลยามมติกฺกนฺตา, ปาจิตฺตึ ชนยนฺตุโภ;

ชนยนฺติ อุโภเปเต, อนฺโตวุตฺถญฺจ สนฺนิธึ.

๑๐๐. สตฺตาหกาลิเก สตฺต, อหานิ อตินามิเต;

ปาจิตฺติ ปาฬินารุเฬฺห, สปฺปิอาทิมฺหิ ทุกฺกฏํ.

๑๐๑. นิสฺสฏฺฐลทฺธํ มกฺเขยฺย, นงฺคํ นชฺโฌหเรยฺย จ;

วิกปฺเปนฺตสฺส สตฺตาเห, สามเณรสฺสธิฏฺฐโต;

มกฺขนาทิญฺจ นาปตฺติ, อญฺญสฺส ททโตปิ จ.

๑๐๒. ยาวกาลิกอาทีนิ, สํสฏฺฐานิ สหตฺตนา;

คาหาปยนฺติ สพฺภาวํ, ตสฺมา เอวมุทีริตํ.

๑๐๓. ปุเร ปฏิคฺคหิตญฺจ, สตฺตาหํ ยาวชีวิกํ;

เสสกาลิกสมฺมิสฺสํ, ปาจิตฺติ ปริภุญฺชโต.

๑๐๔. ยาวกาลิกสมฺมิสฺสํ, อิตรํ กาลิกตฺตยํ;

ปฏิคฺคหิตํ ตทหุ, ตทเหว จ ภุญฺชเย.

๑๐๕. ยามกาลิกสมฺมิสฺสํ, เสสเมวํ วิชานิยํ;

สตฺตาหกาลิกมิสฺสญฺจ, สตฺตาหํ กปฺปเตตรนฺติ.