๙. ปฏิคฺคาหนิทฺเทโส

ปฏิคฺคาโหติ –

๑๐๖. ทาตุกามาภิหาโร จ, หตฺถปาเสรณกฺขมํ;

ติธา เทนฺเต ทฺวิธา คาโห, ปญฺจงฺเควํ ปฏิคฺคโห.

๑๐๗. อสํหาริเย ตตฺถชาเต, สุขุเม จิญฺจอาทินํ;

ปณฺเณ วาสยฺหภาเร จ, ปฏิคฺคาโห น รูหติ.

๑๐๘. สิกฺขามรณลิงฺเคหิ, อนเปกฺขวิสคฺคโต;

อจฺเฉทานุปสมฺปนฺน-ทานา คาโหปสมฺมติ.

๑๐๙. อปฺปฏิคฺคหิตํ สพฺพํ, ปาจิตฺติ ปริภุญฺชโต;

สุทฺธญฺจ นาติพหลํ, กปฺปเต อุทกํ ตถา.

๑๑๐. องฺคลคฺคมวิจฺฉินฺนํ, ทนฺตกฺขิกณฺณคูถกํ;

โลณสฺสุเขฬสิงฺฆาณิ-เสมฺหมุตฺตกรีสกํ.

๑๑๑. คูถมตฺติกมุตฺตานิ, ฉาริกญฺจ ตถาวิเธ;

สามํ คเหตฺวา เสเวยฺย, อสนฺเต กปฺปการเก.

๑๑๒. ทุรูปจิณฺเณ รโชกิณฺเณ, อถุคฺคหปฺปฏิคฺคเห;

อนฺโตวุตฺเถ สยํปกฺเก, อนฺโตปกฺเก จ ทุกฺกฏนฺติ.