๗. ปวารณานิทฺเทโส

ปวารณาติ –

๗๓. เยนีริยาปเถนายํ, ภุญฺชมาโน ปวาริโต;

ตโต อญฺเญน ภุญฺเชยฺย, ปาจิตฺตินติริตฺตกํ.

๗๔. อสนํ โภชนญฺเจว, อภิหาโร สมีปตา;

กายวาจาปฏิกฺเขโป, ปญฺจองฺคา ปวารณา.

๗๕. โอทโน สตฺตุ กุมฺมาโส, มจฺโฉ มํสญฺจ โภชนํ;

สาลิ วีหิ ยโว กงฺคุ, กุทฺรูสวรโคธุมา;

สตฺตนฺนเมสํ ธญฺญานํ, โอทโน โภชฺชยาคุ จ.

๗๖. สามากาทิติณํ กุทฺรูสเก วรกโจรโก;

วรเก สาลิยญฺเจว, นีวาโร สงฺคหํ คโต.

๗๗. ภฏฺฐธญฺญมโย สตฺตุ, กุมฺมาโส ยวสมฺภโว;

มํโส จ กปฺปิโย วุตฺโต, มจฺโฉ อุทกสมฺภโว.

๗๘. ภุญฺชนฺโต โภชนํ กปฺป-มกปฺปํ วา นิเสธยํ;

ปวาเรยฺยาภิหฏํ กปฺปํ, ตนฺนาเมน อิมนฺติ วา.

๗๙. ลาชา ตํสตฺตุภตฺตานิ, โครโส สุทฺธขชฺชโก;

ตณฺฑุลา ภฏฺฐปิฏฺฐญฺจ, ปุถุกา เวฬุอาทินํ.

๘๐. ภตฺตํ วุตฺตาวเสสานํ, รสยาคุ รโสปิ จ;

สุทฺธยาคุผลาทีนิ, น ชเนนฺติ ปวารณํ.

๘๑. ปวาริเตน วุฏฺฐาย, อภุตฺเตน จ โภชนํ;

อติริตฺตํ น กาตพฺพํ, เยน ยํ วา ปุเร กตํ.

๘๒. กปฺปิยํ คหิตญฺเจวุ-จฺจาริตํ หตฺถปาสคํ;

อติริตฺตํ กโรนฺเตวํ, ‘‘อลเมต’’นฺติ ภาสตุ.

๘๓. น กเรนุปสมฺปนฺน-หตฺถคํ เปสยิตฺวาปิ;

กาเรตุํ ลพฺภเต สพฺโพ, ภุญฺชิตุํ ตมการโกติ.