๕๐. วิปสฺสนานิทฺเทโส

วิปสฺสนาติ –

๔๗๑. นามรูปํ ปริคฺคยฺห, ตโต ตสฺส จ ปจฺจยํ;

หุตฺวา อภาวโตนิจฺจา, อุทยพฺพยปีฬนา.

๔๗๒. ทุกฺขา อวสวตฺติตฺตา, อนตฺตาติ ติลกฺขณํ;

อาโรเปตฺวาน สงฺขาเร, สมฺมสนฺโต ปุนปฺปุนํ;

ปาปุเณยฺยานุปุพฺเพน, สพฺพสํโยชนกฺขยนฺติ.

นิคมนกถา

๔๗๓. อธิสีลาธิจิตฺตานํ, อธิปญฺญาย สิกฺขนา;

ภิกฺขุกิจฺจมโต ขุทฺทสิกฺขายํ สมุทาหฏา.

๔๗๔. มหโต กิตฺติสทฺทสฺส, ยสฺส โลกวิจาริโน;

ปริสฺสโม น สมฺโภติ, มาลุตสฺเสว นิจฺจโส.

๔๗๕. เตน ธมฺมสิรีเกน, ตมฺพปณฺณิยเกตุนา;

เถเรน รจิตา ธมฺมวินยญฺญุปสํสิตา.

๔๗๖. เอตฺตาวตายํ นิฏฺฐานํ, ขุทฺทสิกฺขา อุปาคตา;

ปญฺจมตฺเตหิ คาถานํ, สเตหิ ปริมาณโตติ.

ขุทฺทสิกฺขา นิฏฺฐิตา.

นโม ตสฺส ภควโต อรหโต สมฺมาสมฺพุทฺธสฺส