๔๐. อเวภงฺคิยนิทฺเทโส

อเวภงฺคิยนฺติ –

๓๒๒. อารามารามวตฺถูนิ, วิหาโร ตสฺส วตฺถุ จ;

มญฺโจ ปีฐํ ภิสิ พิพฺโพ-หนาทิสยนาสนํ.

๓๒๓. โลหกุมฺภี กฏาโห จ,

โลหภาณกวารโก;

กุฐารี วาสิ ผรสุ,

กุทฺทาโล จ นิขาทนํ.

๓๒๔. วลฺลิ เวฬุ ติณํ ปณฺณํ, มุญฺชปพฺพชมตฺติกา;

ทารุมตฺติกภณฺฑานิ, ปญฺเจเต อวิภาชิยา.

๓๒๕. ถุลฺลจฺจยํ ภาชยโต, ภาชิตาปิ อภาชิตา;

ครุภณฺฑานิ วุจฺจนฺติ, เอเตวิสฺสชฺชิยานิ จ.

๓๒๖. วลฺลิฑฺฒพาหุมตฺตาปิ, เวฬุ อฏฺฐงฺคุลายโต;

ติณาทิ มุฏฺฐิมตฺตมฺปิ, ปณฺณํ เอกมฺปิ มตฺติกา.

๓๒๗. ปากตา ปญฺจวณฺณา วา, สุธากงฺคุฏฺฐ อาทิกา;

ตาลปกฺกปฺปมาณาปิ, ทินฺนา วา ตตฺถชาตกา.

๓๒๘. รกฺขิตา สงฺฆิกา รชฺชุ-โยตฺตาทีปิ อภาชิยา;

นิฏฺฐิเต ภาชิยา กมฺเม, สงฺฆิเก เจติยสฺส วา.

๓๒๙. ปตฺตาทิ ภิกฺขุสารุปฺปํ, ตถา วิปฺปกตากตํ;

ภาชิยํ โลหภณฺเฑสุ, วารกํ ปาทคณฺหกํ.

๓๓๐. เวฬุมฺหิ ภาชิยา เตล-นาฬิ กตฺตรทณฺฑโก;

ฉตฺตทณฺฑสลากาโย, ตโถปาหนทณฺฑโก.

๓๓๑. อนุญฺญาตวาสิทณฺโฑ, กรณฺโฑ ปาทคณฺหโก;

อรณญฺชนิสิงฺคาทิ, ภิกฺขูปกรณํ ตถา.

๓๓๒. ตจฺฉิตานิฏฺฐิตํ ทารุภณฺฑํ ทนฺตญฺจ ภาชิยํ;

ภิกฺขูปกรเณ ปาทฆฏโก มตฺติกามโย.

๓๓๓. ภาชิยํ กปฺปิยํ จมฺมํ, เอฬจมฺมมภาชิยํ;

ครุนา ครุภณฺฑญฺจ, ถาวรํ ถาวเรน จ.

๓๓๔. ถาวรํ ปริวตฺเตยฺย, ตถา กตฺวา จ ภุญฺชตุ;

วลฺลาทึ ผาติกมฺเมน, คเณฺห เสสมภาชิยนฺติ.