๓๙. วสฺสูปนายิกนิทฺเทโส

วสฺสูปนายิกา เจวาติ –

๓๐๙. ปุริมิกา ปจฺฉิมิกา, ทุเว วสฺสูปนายิกา;

ตตฺถาลยปริคฺคาโห, วจีเภโท จ เอทิโส.

๓๑๐. ‘‘อิมสฺมึ วิหาเร อิมํ, เตมาสํ วสฺสํ อุเปมิ;

อิธ วสฺสํ อุเปมี’’ติ, จิตฺตุปฺปาเทตฺถ อาลโย.

๓๑๑. โนเปตุกาโม อาวาสํ, ตทหูติกฺกเมยฺย วา;

ภเวยฺย ทุกฺกฏาปตฺติ, ชานํ วานุปคจฺฉโต.

๓๑๒. ทุติยํ อุปคจฺเฉยฺย, ฉินฺนวสฺโสนุปาคโต;

น ปกฺกเมยฺย เตมาสํ, อวสิตฺวาน จาริกํ.

๓๑๓. มาตาปิตูนมตฺถาย, ปญฺจนฺนํ สหธมฺมินํ;

คิลานตทุปฏฺฐาก-ภตฺตเมสิสฺสโมสธํ.

๓๑๔. ปุจฺฉิสฺสามิ อุปฏฺฐิสฺสํ, คนฺตฺวานภิรตํ อหํ;

วูปกาสิสฺสํ กุกฺกุจฺจํ, ทิฏฺฐึ ครุกมาทิกํ.

๓๑๕. กริสฺสํ วาปิ กาเรสฺสํ, วิโนทนํ วิเวจนํ;

วุฏฺฐานํ วาปิ อุสฺสุกฺกํ, คนฺตุมิจฺเจวมาทินา;

ลพฺภํ สตฺตาหกิจฺเจน, ปหิตาปหิเตปิ วา.

๓๑๖. สงฺฆกมฺเม วเช ธมฺม-สฺสวนตฺถํ นิมนฺติโต;

ครูหิ ปหิโต วาปิ, ครูนํ วาปิ ปสฺสิตุํ.

๓๑๗. น ภณฺฑโธวนุทฺเทส-ญาตุปฏฺฐากทสฺสเน;

ลพฺภํ น ปาปุเณยฺยชฺเช-วาคมิสฺสนฺตุทูรโค.

๓๑๘. เสสญาตีหิ ปหิเต, ภิกฺขุนิสฺสิตเกน จ;

อุปาสโกปาสิกาหิ, นิทฺทิสิตฺวาว เปสิเต.

๓๑๙. วสฺสจฺเฉเท อนาปตฺติ, อนฺตราเย สตตฺตโน;

สงฺฆสามคฺคิยา วา โน, ฉินฺนวสฺโส ปวารเย.

๓๒๐. อชฺโฌกาเส จ รุกฺขสฺส, สุสิเร วิฏเปปิ วา;

ฉวกุฏิฉตฺตจาฏี-สูปคนฺตุํ น วฏฺฏติ.

๓๒๑. อเสนาสนิเกนาปิ, อุปคนฺตุํ น ลพฺภติ;

ปวาเรตุญฺจ ลพฺภติ, นาวาสตฺถวชูปโคติ.