๓๘. กุลทูสนนิทฺเทโส

ทูสนนฺติ –

๒๙๗. ปุปฺผํ เวฬุํ ผลํ จุณฺณํ, ทนฺตกฏฺฐญฺจ มตฺติกํ;

สงฺคหณตฺถํ ททโต, กุลทูสนทุกฺกฏํ.

๒๙๘. ถุลฺลจฺจยํ ครุภณฺฑํ, อิสฺสเรเนตฺถ สงฺฆิกํ;

เทนฺตสฺส ทุกฺกฏาทีนิ, เถยฺยา สงฺฆญฺญ สนฺตกํ.

๒๙๙. กุลสงฺคหา โรเปตุํ, โรปาเปตุญฺจ สพฺพถา;

ผลปุปฺผูปคํ รุกฺขํ, ชคฺคิตุญฺจ น วฏฺฏติ.

๓๐๐. นิมิตฺโตภาสโต กปฺปโวหารปริยายโต;

อตฺตโน ปริโภคตฺถํ, โรปนาทีนิ ลพฺภเร.

๓๐๑. วุตฺตาว เวชฺชิกา ชงฺฆเปสเน คิหิกมฺมสุ;

ฐเปตฺวา ปิตโร ภณฺฑุํ, เวยฺยาวจฺจกรํ สกํ.

๓๐๒. ทุกฺกฏํ ปทวาเรน, หรเณ ทูตสาสนํ;

สาสนํ อคฺคเหตฺวาปิ, ปฐมํ วทโต ปุน.

๓๐๓. อุปฺปนฺนปจฺจยา เอวํ, ปญฺจนฺนมฺปิ อกปฺปิยา;

อภูตาโรจนารูป-สํโวหารุคฺคหาทิสา.

๓๐๔. หราเปตฺวา หริตฺวาปิ, ปิตูนํ เสสญาตินํ;

ปตฺตานํ วตฺถุปูชตฺถํ, ทาตุํ ปุปฺผานิ ลพฺภติ;

มณฺฑนตฺถญฺจ ลิงฺคาทิ-ปูชตฺถญฺจ น ลพฺภติ.

๓๐๕. ตถา ผลํ คิลานานํ, สมฺปตฺติสฺสริยสฺส จ;

ปริพฺพยวิหีนานํ, ทาตุํ สปรสนฺตกํ.

๓๐๖. ภาเชนฺเต ผลปุปฺผมฺหิ, เทยฺยํ ปตฺตสฺส กสฺสจิ;

สมฺมเตนาปโลเกตฺวา, ทาตพฺพมิตเรน ตุ.

๓๐๗. วิหาเร วา ปริจฺฉิชฺช, กตฺวาน กติกํ ตโต;

เทยฺยํ ยถาปริจฺเฉทํ, คิลานสฺเสตรสฺส วา;

ยาจมานสฺส กติกํ, วตฺวา รุกฺขาว ทสฺสิยา.

๓๐๘. สิรีสกสวาทีนํ, จุณฺเณ เสเส จ นิจฺฉโย;

ยถาวุตฺตนโย เอว, ปณฺณมฺเปตฺถ ปเวสเยติ.