๓๗. อุคฺคหนิทฺเทโส

อุคฺคโหติ –

๒๘๑. กมฺมเจติยสงฺฆญฺญ-ปุคฺคลตฺถํ คณสฺส จ;

ทสเภทมฺปิ รตนํ, อุคฺคณฺหนฺตสฺส ทุกฺกฏํ.

๒๘๒. นิสฺสคฺคิ เตสุ อตฺตตฺถํ, ทฺวีสุ เสเสสุ ทุกฺกฏํ;

อนามสิตฺวา วุตฺเต ตุ, คณํ สงฺฆญฺจ ปุคฺคลํ.

๒๘๓. ‘‘เจตฺยสฺส นวกมฺมสฺส, ทมฺมี’’ติ น ปฏิกฺขิเป;

วเท กปฺปิยการานํ, ‘‘วทนฺเตวมิเม’’ อิติ.

๒๘๔. เขตฺตํ วตฺถุํ ตฬากํ วา, เทนฺเต ทาสปสฺวาทิกํ;

ปฏิกฺขิปิตฺวา คเณฺหยฺย, กปฺปิเยน กเมน จ;

เขตฺตาทีนิ วิหารสฺส, วุตฺเต ทมฺมีติ วฏฺฏติ.

๒๘๕. นวมาติกเกทาร-ตฬากกิริยานเว;

มตฺติกุทฺธรณํ พนฺโธ, ถิรกาโร จ อาฬิยา.

๒๘๖. ติเรกภาคคหณํ, เกทาเร อนเว นเว;

อปริจฺฉนฺนภาเค จ, สสฺเส ‘‘เทเถตฺตเก’’ อิติ;

กหาปณุฏฺฐาปนญฺจ, สพฺเพสมฺปิ อกปฺปิยํ.

๒๘๗. อวตฺวา กส วปฺปิจฺจาเทตฺติกาย จ ภูมิยา;

ปติฏฺฐาเปติ ภูมึ วา, ภาโค เทยฺโยติ เอตฺตโก.

๒๘๘. ภูมิภาเค กตํ สสฺสํ, เอตฺตเก คณฺหเถตฺตกํ;

คณฺหนตฺถํ วทนฺเตวํ, ปมาณํ ทณฺฑรชฺชุภิ.

๒๘๙. มินเน รกฺขเณ ฐตฺวา, ขเล ตํนีหราปเน;

โกฏฺฐาทิปฏิสามเน, ตสฺเสเวตมกปฺปิยํ.

๒๙๐. ปฏิสาเมยฺย ปาจิตฺติ, ยํ กิญฺจิ คิหิสนฺตกํ;

ภณฺฑาคาริกสีเสน, สเจปิ ปิตุสนฺตกํ.

๒๙๑. ปิตูนํ กปฺปิยํ วตฺถุํ, อวสฺสํ ปฏิสามิยํ;

อตฺตโน สนฺตกํ กตฺวา, ลพฺภเต ปฏิสามิตุํ.

๒๙๒. เทหีติ ปฏิสาเมตฺวา, วุตฺเต จาปิ ปฏิกฺขิเป;

ปาเตตฺวาน คเต ลพฺภํ, ปลิโพโธติ โคปิตุํ.

๒๙๓. กมฺมํ กโรนฺโต อาราเม, สกํ วฑฺฒกิอาทโย;

ปริกฺขารญฺจ สยน-ภณฺฑํ วา ราชวลฺลภา.

๒๙๔. เทหีติ ปฏิสาเมตฺวา, วทนฺติ ยทิ ฉนฺทโต;

น กเรยฺย ภยา ฐานํ, คุตฺตํ ทสฺเสตุ วฏฺฏติ.

๒๙๕. พลกฺกาเรน ปาเตตฺวา, คเตสุ ปฏิสามิตุํ;

ภิกฺขุํ มนุสฺสา สงฺกนฺติ, นฏฺเฐ วตฺถุมฺหิ ตาทิเส.

๒๙๖. วิหาราวสถสฺสนฺโต, รตนํ รตฺนสมฺมตํ;

นิกฺขิเปยฺย คเหตฺวาน, มคฺเครญฺเญปิ ตาทิเส;

สามิกานาคมํ ญตฺวา, ปติรูปํ กรียตีติ.