๓๖. เภสชฺชนิทฺเทโส

เภสชฺชนฺติ –

๒๗๔. ชนสฺส กาตุํ เภสชฺชํ, ทาตุํ วตฺตุํ น ลพฺภติ;

ภิกฺขาจริยวิญฺญตฺติ, สเกหิ สหธมฺมินํ.

๒๗๕. ปิตูนํ ตทุปฏฺฐากภิกฺขุนิสฺสิตภณฺฑุนํ;

ลพฺภํ เภสชฺชกรณํ, เวยฺยาวจฺจกรสฺส จ.

๒๗๖. มหาจูฬปิตามาตาภาตาภคินิอาทินํ;

เตสํ สเกนตฺตนิเย, ทาตพฺพํ ตาวกาลิกํ.

๒๗๗. กุลทูสนวิญฺญตฺติ, เภสชฺชกรณาทิ หิ;

มาตาปิตูหิ สมฺพนฺธญาตเกสุ น รูหติ.

๒๗๘. ปิณฺฑปาโต อนามฏฺโฐ, มาตาทีนมวาริโต;

ฉนฺนํ ทามริกโจรสฺส, ทาตุมิสฺสริยสฺส จ.

๒๗๙. เตสํ สุตฺโตทเกเหว, ปริตฺตํ กยิรา นตฺตโน;

ภณิตพฺพํ ภณาเปนฺเต, ปริตฺตํ สาสโนคธํ.

๒๘๐. สีลํ ธมฺมํ ปริตฺตํ วา, อาคนฺตฺวา เทตุ ภาสตุ;

ทาตุํ วตฺตุญฺจ ลพฺภติ, คนฺตฺวา เกนจิ เปสิโตติ.