๓๕. ปริกฺขารนิทฺเทโส

ปริกฺขาโรติ –

๒๕๙. ปญฺจวณฺเณหิ สุตฺเตหิ, อนฺโต พหิ จ สิพฺพิตุํ;

คิริกูฏฑฺฒจนฺทาทึ, ฉตฺเต ปณฺเณ จ ฉินฺทิตุํ.

๒๖๐. ฆฏกํ วาฬรูปํ วา, ทณฺเฑ เลขา น วฏฺฏติ;

วฏฺฏตี ทณฺฑพุนฺทมฺหิ, อหิจฺฉตฺตกสาทิสํ.

๒๖๑. สิพฺพิตุํ เอกวณฺเณน, ปญฺชรํ วา วินนฺธิตุํ;

ถิรตฺถํ วฏฺฏตี ฉตฺเต, ทณฺเฑ เลขาว พนฺธิตุํ.

๒๖๒. อนฺเต ปฏฺฏมุเข วาปิ, เวณิ สงฺขลิกาปิ วา;

สูจิวิการมญฺญํ วา, จีวเร น จ กปฺปติ;

กปฺปพินฺทุวิการมฺปิ, ปาฬิกณฺณิกอาทิกํ.

๒๖๓. คณฺฐิปาสกปฏฺฏาปิ, จตุกฺโกณาว อคฺฆิยํ;

มุคฺคโร กกฺกฏจฺฉาทิ-วิการํ เนตฺถ วฏฺฏติ.

๒๖๔. โกณสุตฺตา จ ปีฬกา, ทุวิญฺเญยฺยาว กปฺปเร;

คนฺธํ เตลํ ว ลาขํ วา, รชเน น จ ปกฺขิเป.

๒๖๕. รตฺตํ สงฺเขน มณินา, ฆฏฺเฏยฺยญฺเญน วา น จ;

ฆํเสยฺย โทณิยํ กตฺวา, ปหาเร น จ มุฏฺฐินา.

๒๖๖. กณฺณโกณกสุตฺตานิ, รตฺเต ฉินฺเทยฺย จีวเร;

เลขา น วฏฺฏตี ธมฺม-กรเณ ฉตฺตวฏฺฏิยํ.

๒๖๗. เลขํ ฐเปตฺวา มณิกา, ปีฬกา กุญฺจิกาย จ;

ปิปฺผเล จ ปริจฺเฉท-เลขา ทณฺฑมฺหิ วฏฺฏติ.

๒๖๘. มาลาทฺยรณิยํ ปตฺต-มณฺฑเล ภิตฺติกมฺม จ;

เหฏฺฐา เลขาทฺวยํ อุทฺธํ, อหิจฺฉตฺตกสาทิสํ.

๒๖๙. หิตฺวา กตฺตรยฏฺฐิมฺหิ, สูจิสณฺฑาสเกปิ จ;

ยํ กิญฺจิ คิริกูฏาทิ-วณฺณมฏฺฐํ น วฏฺฏติ.

๒๗๐. พิมฺโพหเน ภิสิมญฺจ-ปีฐาทิสยนาสเน;

สมฺมุญฺชนิมฺหิ สงฺการ-ฉฑฺฑเน รงฺคภาชเน.

๒๗๑. ปานียภาชเน ปาท-ปีเฐ กถลิกาย จ;

ปตฺตาธารปิธาเนสุ, ตาลวณฺเฏ จ พีชเน;

ยํ กิญฺจิ มาลากมฺมาทิ-วณฺณมฏฺฐมวาริตํ.

๒๗๒. เสนาสเน ปน ทฺวารกวาฏาทิปฺปเภทเน;

โสวณฺณมยนุญฺญาตํ, วณฺณมฏฺฐมฺหิ กา กถา.

๒๗๓. วิสาณนาฬิลาพฺวาทิปฺปเภเท เตลภาชเน;

ปุมิตฺถิรูปรหิตํ, วณฺณมฏฺฐมวาริตนฺติ.