๓๔. ปถวีนิทฺเทโส

ปถวี จาติ –

๒๔๒. ชาตาชาตาติ ทุวิธา, สุทฺธมตฺติกปํสุกา;

ชาตาทฑฺฒา จ ปถวี, พหุมตฺติกปํสุกา;

จาตุมาสาธิโกวฏฺฐปํสุมตฺติกราสิ จ.

๒๔๓. สุทฺธสกฺขรปาสาณมรุมฺพกถลวาลุกา;

ทฑฺฒา จ ภูมิ เยภุยฺยสกฺขราทิมหีปิ จ;

ทุติยา วุตฺตราสิ จ, จาตุมาโสมวฏฺฐโก.

๒๔๔. เทฺว ภาคา ตีสุ ภาเคสุ, มตฺติกา ยสฺส ภูมิยา;

เยภุยฺยมตฺติกา เอสา, เสเสสุปิ อยํ นโย.

๒๔๕. ปาจิตฺติ ขณเน ชาเต, ชาตสญฺญิสฺส ทุกฺกฏํ;

เทฺวฬฺหสฺสาชาตสญฺญิสฺส, นาปตฺตาณาปเน ตถา.

๒๔๖. ปหาเร ปหาราปตฺติ, ขณมานสฺส อตฺตนา;

เอกายาณตฺติยา เอกา, นานาณตฺตีสุ วาจโส.

๒๔๗. ‘‘อิมํ ฐานมิมํ กนฺทมิธ วาปึ ขเณตฺถ จ;

ชาเลหคฺคิ’’นฺติ วา วตฺตุํ, นิยเมตฺวา น วฏฺฏติ.

๒๔๘. ‘‘ถมฺภสฺสิมสฺสาวาฏํ วา, มตฺติกํ ชาน มาหร;

กโรหิ กปฺปิยญฺเจ’’ติ, วจนํ วฏฺฏเตทิสํ.

๒๔๙. อสมฺพทฺธํ ปถวิยา, สุกฺขกทฺทมอาทิกํ;

โกเปตุํ ตนุกํ ลพฺภมุสฺสิญฺจนียกทฺทมํ.

๒๕๐. คณฺฑุปฺปาทํ อุปจิกามตฺติกํ มูสิกุกฺกิรํ;

จาตุมาสาธิโกวฏฺฐํ, เลฑฺฑาทิญฺจ น โกปเย.

๒๕๑. ปติเต วาปิอาทีนํ, กูเล อุทกสนฺติเก;

ปาสาเณ จ รเช ลคฺเค, ปติเต นวโสณฺฑิยา.

๒๕๒. วมฺมิเก มตฺติกากุฏฺเฏ, อพฺโภกาสุฏฺฐิเต ตถา;

เยภุยฺยกถลฏฺฐาเน, ติฏฺฐติฏฺฐกกุฏฺฏโก.

๒๕๓. ถมฺภาทึ คณฺหิตุํ ภูมึ, สญฺจาเลตฺวา วิโกปยํ;

ธาราย ภินฺทิตุํ ภูมึ, กาตุํ วา วิสมํ สมํ.

๒๕๔. สมฺมุญฺชนีหิ ฆํสิตุํ, กณฺฏกาทึ ปเวสิตุํ;

ทสฺเสสฺสามีติ ภินฺทนฺโต, ภูมึ จงฺกมิตุํ ปทํ.

๒๕๕. ฆํสิตุํ องฺคปจฺจงฺคํ, กณฺฑุโรคี ตฏาทิสุ;

หตฺถํ วา โธวิตุํ ภูมึ, ฆํสิตุํ น จ กปฺปติ.

๒๕๖. ถมฺภาทิอุชุกุทฺธาโร, ปาสาณาทิปวฏฺฏนํ;

สาขาทิกฑฺฒนํ รุกฺขลตาจฺเฉทนผาลนํ.

๒๕๗. เสโก ปสฺสาวอาทีนํ, สุทฺธจิตฺตสฺส วฏฺฏติ;

อลฺลหตฺถํ ฐเปตฺวาน, รชคฺคาโห จ ภูมิยา.

๒๕๘. อคฺคิสฺส อนุปาทาเน, กปาเล อิฏฺฐกาย วา;

ปาเตตุํ ลพฺภเต อคฺคึ, ภูมิยํ วาวเส สตีติ.