๓๓. กายพนฺธนนิทฺเทโส

กายพนฺธนนฺติ –

๒๓๕. อกายพนฺธโน คามํ, ทุกฺกฏํ ปวิเสยฺย เจ;

พนฺเธยฺย ยตฺถ สรติ, ตตฺเถวาสติยา คโต.

๒๓๖. ปฏฺฏิกา สูกรนฺตนฺติ, ทุวิธํ กายพนฺธนํ;

ทุสฺสปฏฺโฏ จ รชฺชุ จ, เอกา ตทนุโลมิกา.

๒๓๗. มจฺฉกณฺฏกขชฺชูรี-ปตฺตา มฏฺฐา จ ปฏฺฏิกา;

ลพฺภา ทสา จตสฺโสปิ, อนฺเต ทิคุณสุตฺตกํ.

๒๓๘. มาลาทึ กกฺกฏจฺฉาทึ, ทสฺเสตฺวา คุณสุตฺตก;

โกฏฺฏิตา กุญฺชรจฺฉาทึ, ปฏฺฏิกา น จ กปฺปติ.

๒๓๙. ฆฏกํ มกรมุขาทึ, น กปฺปนฺติ ทสามุเข;

อุภนฺเต ฆฏกา เลขา, วิเธ อญฺญญฺจ จิตฺตกํ.

๒๔๐. เทฑฺฑุภกญฺจ มุรชํ, มทฺทวีณํ กลาพุกํ;

น กปฺปนฺติ ทสาสุ เทฺว, มชฺฌิมาเยว กปฺปเร.

๒๔๑. เวฬุทนฺตวิสาณฏฺฐิกฏฺฐลาขาผลามยา;

สงฺขนาภิมยา สุตฺตนฬโลหมยาปิ จ;

วิธา กปฺปนฺติ กปฺปิยา, คณฺฐิโย จาปิ ตมฺมยาติ.

ปฐมภาณวารํ นิฏฺฐิตํ.