๓๒. นิสฺสยนิทฺเทโส

นิสฺสโยติ –

๒๓๐. พฺยตฺตสฺส ปญฺจวสฺสสฺส, นตฺถิ นิสฺสย การิยํ;

ยาวชีวมฺปิ อพฺยตฺโต, นิสฺสิโตเยว ชีวติ.

๒๓๑. เอกํสํ จีวรํ กตฺวา, ปคฺคณฺหิตฺวาน อญฺชลึ;

อุกฺกุฏิกํ นิสีทิตฺวา, วเท ยาวตตียกํ;

‘‘อาจริโย เม, ภนฺเต, โหหิ,

อายสฺมโต นิสฺสาย วจฺฉามี’’ติ.

๒๓๒. ปกฺกนฺเต ปกฺขสงฺกนฺเต, วิพฺภนฺเต วาปิ นิสฺสโย;

มรณาณตฺตุปชฺฌาย-สโมธาเนหิ สมฺมติ.

๒๓๓. นิสฺสาย น วเสลชฺชึ, อปุพฺพํ ฐานมาคโต;

อาคเม จตุปญฺจาหํ, ญาตุํ ภิกฺขุสภาคตํ.

๒๓๔. อทฺธิกสฺส คิลานสฺส, คิลานุปฏฺฐกสฺส จ;

ยาจิตสฺส อรญฺเญ วา, สลฺลกฺขนฺเตน ผาสุกํ;

สภาเค ทายเกสนฺเต, วสิตุํ ตาว ลพฺภตีติ.