๓๑. วิกปฺปนานิทฺเทโส

วิกปฺปนา เจวาติ –

๒๒๑. สมฺมุขา ปรมฺมุขาติ, ทุเว วุตฺตา วิกปฺปนา;

สมฺมุขาย วิกปฺเปนฺโต, พฺยตฺตสฺเสกสฺส สนฺติเก;

‘‘อิมํ จีวรํ ตุยฺหํ, วิกปฺเปมี’’ติ ภาสเย.

๒๒๒. เอตฺตาวตา นิเธตุํว, กปฺปตี น จ กปฺปติ;

ปริโภคาทิกํ เตน, อปฺปจฺจุทฺธฏภาวโต.

๒๒๓. ‘‘มยฺหํ สนฺตกํ ปริภุญฺช วา วิสฺสชฺเชหิ วา ยถาปจฺจยํ วา กโรหี’’ติ –

เตน ปจฺจุทฺธเฏเยว, ปริโภคาทิ กปฺปติ.

๒๒๔. อปรา สมฺมุขาเวกา, ภิกฺขุสฺเสกสฺส สนฺติเก;

คเหตฺวา นามเมกสฺส, ปญฺจนฺนํ สหธมฺมินํ.

๒๒๕. ‘‘อิมํ จีวรํ ติสฺสสฺส ภิกฺขุโน, ติสฺสาย ภิกฺขุนิยา, ติสฺสสฺส สามเณรสฺส, ติสฺสาย สามเณริยา, ติสฺสาย สิกฺขมานาย วิกปฺเปมี’’ติ วตฺตพฺพํ.

เตน ภิกฺขุนา ‘‘ติสฺสสฺส ภิกฺขุโน, ติสฺสาย ภิกฺขุนิยา, ติสฺสสฺส สามเณรสฺส, ติสฺสาย สามเณริยา, ติสฺสาย สิกฺขมานาย สนฺตกํ ปริภุญฺช วา วิสฺสชฺเชหิ วา ยถาปจฺจยํ วา กโรหี’’ติ วตฺตพฺพํ.

๒๒๖. ปรมฺมุขาวิกปฺปเน-กสฺสนฺติเกวมีรเย;

‘‘อิมํ จีวรํ ตุยฺหํ วิกปฺปนตฺถาย ทมฺมี’’ติ.

๒๒๗. เตน วตฺตพฺโพ ‘‘โก เต มิตฺโต วา สนฺทิฏฺโฐ วา’’ติ. อิตเรน เจวํ วตฺตพฺพํ ‘‘ติสฺโส ภิกฺขู’’ติ วา ‘‘ติสฺสา ภิกฺขุนี’’ติ วา ‘‘ติสฺโส สามเณโร’’ติ วา ‘‘ติสฺสา สามเณรี’’ติ วา ‘‘ติสฺสา สิกฺขมานา’’ติ วา.

ปุน เตน ‘‘อหํ ติสฺสสฺส ติสฺสาย วา ทมฺมี’’ติ วิกปฺเปตฺวา เตเนว ‘‘ติสฺสสฺส ภิกฺขุโน, ติสฺสาย ภิกฺขุนิยา, ติสฺสสฺส สามเณรสฺส, ติสฺสาย สามเณริยา, ติสฺสาย สิกฺขมานาย สนฺตกํ ปริภุญฺช วา วิสฺสชฺเชหิ วา ยถาปจฺจยํ วา กโรหี’’ติ ปจฺจุทฺธริตพฺพํ.

๒๒๘. ทูรสนฺติกตฺเตกตฺตพหุภาวํ วิชานิย;

‘‘เอตํ อิม’’นฺติ ‘‘เอตานิ, อิมานี’’เตตฺถ โยชเย.

๒๒๙. ทสาหํ มาสเมกํ วา, ปญฺจ วา กถินตฺถเต;

ปาริปูรตฺถมูนสฺส, ปจฺจาสา สติ มาสกํ;

นุปฺปาทยติ นิสฺสคฺคึ, นาธิฏฺฐิตวิกปฺปิตนฺติ.