๓๐. วตฺตนิทฺเทโส

วตฺตนฺติ –

๒๑๓. อาคนฺตุโก น อารามํ, ปวิเส สอุปาหโน;

สฉตฺโตคุณฺฐิโต สีเส, กริตฺวา วาปิ จีวรํ.

๒๑๔. ปานีเยน น โธเวยฺย, ปาเท วุฑฺฒตเรปิ จ;

อาวาสิเกภิวาเทยฺย, ปุจฺเฉยฺย สยนาสนํ.

๒๑๕. คมิโก ปฏิสาเมตฺวา, ทารุมตฺติกภณฺฑกํ;

วิหารญฺจ ถเกตฺวาน, อาปุจฺฉ สยนาสนํ.

๒๑๖. อาปุจฺฉิตพฺเพ อสติ, สํโคเปตฺวาน สาธุกํ;

ปกฺกเมยฺยญฺญถา ตสฺส, ปกฺกนฺตุํ น จ กปฺปติ.

๒๑๗. อาวาสิโก ปญฺญาเปยฺย, วุฑฺฒาคนฺตุสฺส อาสนํ;

อุปนิกฺขิเป ปาโทท-ปฺปภุตึ ปตฺตจีวรํ.

๒๑๘. ปจฺจุคฺคนฺตฺวาน คเณฺหยฺย, ปานีเยน จ ปุจฺฉเย;

อาคนฺตุเกภิวาเทยฺย, ปญฺญเป สยนาสนํ.

๒๑๙. อชฺฌาวุตฺถมวุตฺถํ วา, โคจราโคจรํ วเท;

วจฺจปสฺสาวฐานานิ, กติกํ เสกฺขสมฺมุตึ.

๒๒๐. ปเวสนิกฺขเม กาลํ, ปริโภชิยปานิยํ;

นิสินฺโนว นวกสฺส, เอตํ สพฺพํ สมุทฺทิเสติ.