๒๘. กมฺมนิทฺเทโส

กมฺมญฺจาติ –

๑๙๙. วคฺเคน อธมฺมกมฺมํ, สมคฺเคน อธมฺมิกํ;

วคฺเคน ธมฺมกมฺมญฺจ, สมคฺเคน จ ธมฺมิกํ;

จตุตฺถํเยวานุญฺญาตํ, เสสกมฺเมสุ ทุกฺกฏํ.

๒๐๐. จตุวคฺโค ปญฺจวคฺโค, ทสวีสติวคฺคิโก;

ติเรกวีสติวคฺโค, ปญฺจ สงฺฆา วิภาวิตา.

๒๐๑. จตุวคฺเคตฺถ อพฺภานุ-ปสมฺปทาปวารณา;

ปญฺจวคฺโค จ อพฺภานํ, มชฺฌเทสุปสมฺปทํ.

๒๐๒. ทสวคฺโค จ อพฺภานํ, ฐเปตฺวา สพฺพกมฺมิโก;

อิตโร สพฺพกมฺเมสุ, กมฺมปฺปตฺโตติ ทีปิโต.

๒๐๓. จตุวคฺเคน กตฺตพฺเพ, จตฺตาโร ปกตตฺตกา;

กมฺมปฺปตฺตา ปเร ฉนฺทา-รหา เสเสปฺยยํ นโย.

๒๐๔. จตุวคฺคาทิกตฺตพฺพํ, อสํวาสกมฺมารห;

ครุกฏฺเฐสฺวญฺญตรํ, กตฺวาน คณปูรกํ;

ปริวาสาทิกํ กมฺมํ, กตํ กุปฺปญฺจ ทุกฺกฏํ.

๒๐๕. อธมฺมกมฺมํ วาเรยฺย, อนฺตราเย ทุเว ตโย;

ทิฏฺฐาวิเมโกธิฏฺฐานํ, วาเรนฺเตว ตโตธิกา.

๒๐๖. กมฺมารหา อสํวาสา, ขิตฺตจิตฺตทุขฏฺฏิตา;

เอเตสํ สงฺฆมชฺฌมฺหิ, ปฏิกฺเขโป น รุหติ.

๒๐๗. ปกตตฺเตกสีมฏฺฐ-สมสํวาสภิกฺขุโน;

อาโรเจนฺตสฺสนฺตมโส-นนฺตรสฺสาปิ รูหติ.

๒๐๘. โกเปตุํ ธมฺมิกํ กมฺมํ, ปฏิกฺโกเสยฺย สมฺมุขา;

ติโรกฺขา กายสามคฺคึ, ฉนฺทํ โน เทยฺย ทุกฺกฏนฺติ.