๑๖. วจฺจปสฺสาวฏฺฐานิกนิทฺเทโส

วจฺจปสฺสาวฏฺฐานิกนฺติ –

๑๕๖. น กเรยฺย ยถาวุฑฺฒํ, วจฺจํ ยาตานุปุพฺพิยา;

วจฺจปสฺสาวกุฏิโย, นฺหานติตฺถญฺจ ลพฺภติ.

๑๕๗. ปวิเสยฺยุพฺภชิตฺวา โน, สหสา ปวิเสยฺย จ;

อุกฺกาสิตฺวาวุพฺภเชยฺย, ปาทุกาเสฺวว สณฺฐิโต.

๑๕๘. น กเร นิตฺถุนํ วจฺจํ, ทนฺตกฏฺฐญฺจ ขาทยํ;

วจฺจปสฺสาวโทณีนํ, น กเรยฺยุภยํ พหิ.

๑๕๙. กูเป กฏฺฐํ น ปาเตยฺย, เขฬํ ปสฺสาวโทณิยา;

นาวเลเขยฺย ผรุเส-นุหตญฺจาปิ โธวเย.

๑๖๐. น นิกฺขเมยฺย สหสา-วุพฺภชิตฺวา น นิกฺขเม;

จปุ จปุ นาจเมยฺย, อุกฺลาปญฺจ วิโสธเยติ.