๑๕. อุปชฺฌาจริยวตฺตนิทฺเทโส

อุปชฺฌาจริยวตฺตานีติ –

๑๔๕. นิสฺสายุปชฺฌาจริเย, วสมาโน สุเปสโล;

ทนฺตกฏฺฐาสนํ โตยํ, ยาคุํ กาเล ทเท สทา.

๑๔๖. ปตฺเต วตฺตํ จเร คาม-ปฺปเวเส คมนาคเม;

อาสเน ปาทปีเฐ จ, กถโลปาหนจีวเร.

๑๔๗. ปริโภชนียปานีย-วจฺจปฺปสฺสาวฐานิสุ;

วิหารโสธเน วตฺตํ, ปุน ปญฺญาปเน ตถา.

๑๔๘. น ปปฺโผเฏยฺย โสเธนฺโต, ปฏิวาเต จ สงฺคเณ;

วิหารํ ภิกฺขุ ปานีย-สามนฺตา สยนาสนํ.

๑๔๙. นฺหาเน นฺหาตสฺส กาตพฺเพ, รงฺคปาเก จ โธวเน;

สิพฺพเน จีวเร เถเว, รชนฺโต น วเช ฐิเต.

๑๕๐. เอกจฺจสฺส อนาปุจฺฉา, ปตฺตํ วา จีวรานิ วา;

น ทเทยฺย น คเณฺหยฺย, ปริกฺขารญฺจ กิญฺจนํ.

๑๕๑. เอกจฺจํ ปจฺฉโต กาตุํ, คนฺตุํ วา ตสฺส ปจฺฉโต;

ปิณฺฑปาตญฺจ นินฺเนตุํ, นีหราเปตุมตฺตโน.

๑๕๒. กิจฺจยํ ปริกมฺมํ วา, เกสจฺเฉทญฺจ อตฺตโน;

การาเปตุํ ว กาตุํ วา, อนาปุจฺฉา น วฏฺฏติ.

๑๕๓. คามํ สุสานํ นิสฺสีมํ, ทิสํ วา คนฺตุมิจฺฉโต;

อตฺตโน กิจฺจยํ วาปิ, อนาปุจฺฉา น วฏฺฏติ.

๑๕๔. อุปฺปนฺนํ อรตึ ทิฏฺฐึ, กุกฺกุจฺจํ วา วิโนทเย;

กเรยฺย วาปิ อุสฺสุกฺกํ, สงฺฆายตฺเตสุ กมฺมสุ.

๑๕๕. คิลาเนสุ อุปฏฺเฐยฺย, วุฏฺฐานํ เนสมาคเม;

วตฺตเภเทน สพฺพตฺถ, อนาทเรน ทุกฺกฏนฺติ.