๑๔. ภูมินิทฺเทโส

ภูมิโยติ –

๑๓๖. สมฺมุตุสฺสาวนนฺตา จ, โคนิสาที คหาปติ;

กปฺปิยา ภูมิโย ยาสุ, วุตฺถํ ปกฺกญฺจ กปฺปติ.

๑๓๗. วาสตฺถาย กเต เคเห, สงฺฆิเก เวกสนฺตเก;

กปฺปิยา กุฏิ ลทฺธพฺพา, สหเสยฺยปฺปโหนเก.

๑๓๘. เคเห สงฺฆสฺส เวกสฺส, กรมาเนวมีรยํ;

ปฐมิฏฺฐกถมฺภาทึ, ฐเปยฺยุสฺสาวนนฺติกา;

‘‘กปฺปิยกุฏึ กโรม, กปฺปิยกุฏึ กโรมา’’ติ.

๑๓๙. เยภุยฺเยนาปริกฺขิตฺโต, อาราโม สกโลปิ วา;

วุจฺจเต ‘‘โคนิสาที’’ติ, สมฺมุตี สงฺฆสมฺมตา.

๑๔๐. ภิกฺขุํ ฐเปตฺวา อญฺเญหิ, ทินฺโน เตสํว สนฺตโก;

อตฺถาย กปฺปกุฏิยา, เคโห คหปตี มโต.

๑๔๑. อกปฺปกุฏิยา วุตฺถสปฺปิอาทีหิ มิสฺสิตํ;

วเชยฺย อนฺโตวุตฺถตฺตํ, ปุริมํ กาลิกทฺวยํ.

๑๔๒. เตเหว ภิกฺขุนา ปกฺกํ, กปฺปเต ยาวชีวิกํ;

นิรามิสํว สตฺตาหํ, สามิเส สามปากตา.

๑๔๓. อุสฺสาวนนฺติกา เยหิ, ถมฺภาทีหิ อธิฏฺฐิตา;

เตสุเยวาปนีเตสุ, ตทญฺเญสุปิ ติฏฺฐติ.

๑๔๔. สพฺเพสุ อปนีเตสุ, ภเว ชหิตวตฺถุกา;

โคนิสาที ปริกฺขิตฺเต, เสสา ฉทนวิพฺภมาติ.