๑๓. สมณกปฺปนิทฺเทโส

สมณกปฺปาติ –

๑๒๕. ภูตคามสมารมฺเภ, ปาจิตฺติ กตกปฺปิยํ;

นเขน วาคฺคิสตฺเถหิ, ภเว สมณกปฺปิยํ.

๑๒๖. ส มูลขนฺธพีชคฺค-ผฬุพีชปฺปภาวิโต;

อารมฺเภ ทุกฺกฏํ พีชํ, ภูตคามวิโยชิตํ.

๑๒๗. นิพฺพฏฺฏพีชํ โนพีช-มกตญฺจาปิ กปฺปติ;

กฏาหพทฺธพีชานิ, พหิทฺธา วาปิ การเย.

๑๒๘. เอกาพทฺเธสุ พีเชสุ, ภาชเน วาปิ ภูมิยํ;

กเต จ กปฺปิเยกสฺมึ, สพฺเพเสฺวว กตํ ภเว.

๑๒๙. นิกฺขิตฺเต กปฺปิยํ กตฺวา, มูลปณฺณานิ ชายรุํ;

กปฺปิยํ ปุน กาเรยฺย, ภูตคาโม หิ โส ตทา.

๑๓๐. สปณฺโณ วา อปณฺโณ วา, เสวาโลทกสมฺภโว;

เจติยาทีสุ เสวาโล, นิพฺพฏฺฏทฺวตฺติปตฺตโก;

ภูตคาโมว พีชมฺปิ, มูลปณฺเณ วินิคฺคเต.

๑๓๑. ฆฏาทิปิฏฺเฐ เสวาโล, มกุฬํ อหิฉตฺตกํ;

ทุกฺกฏสฺเสว วตฺถูนิ, ผุลฺลมพฺยวหาริกํ.

๑๓๒. ลาขานิยฺยาสฉตฺตานิ, อลฺลรุกฺเข วิโกปิย;

คณฺหโต ตตฺถ ปาจิตฺติ, ฉินฺทโต วาปิ อกฺขรํ.

๑๓๓. ปีเฬตุํ นาฬิเกราทึ, ทารุมกฺกฏกาทินา;

ฉินฺทิตุํ คณฺฐิกํ กาตุํ, ติณาทึ น จ กปฺปติ.

๑๓๔. ภูตคามํ ว พีชํ วา, ฉินฺท ภินฺโทจินาหิ วา;

ผาเลหิ วิชฺฌ ปจ วา, นิยเมตฺวา น ภาสเย.

๑๓๕. อิมํ กโรหิ กปฺปิยํ, อิมํ คเณฺหทมาหร;

อิมํ เทหิ อิมํ โสเธเหวํ วฏฺฏติ ภาสิตุนฺติ.