๗. คพฺภินีวคฺโค

๑-๒. คพฺภินีอาทิสิกฺขาปทวณฺณนา

ปฐมํ อุตฺตานตฺถเมว.

ถเน ภวํ ถญฺญํ, ขีรํ. ยํ ปาเยตีติ ยํ ทารกํ ปาเยติ.

คพฺภินีอาทิสิกฺขาปทวณฺณนา นิฏฺฐิตา.

๓. ปฐมสิกฺขมานสิกฺขาปทวณฺณนา

ปทภาชเน วุตฺตนเยนาติ ‘‘ปาณาติปาตา เวรมณึ เทฺว วสฺสานิ อวีติกฺกมฺม สมาทานํ สมาทิยามิ…เป… วิกาลโภชนา เวรมณึ เทฺว วสฺสานิ อวีติกฺกมฺม สมาทานํ สมาทิยามี’’ติ (ปาจิ. ๑๐๗๙) ปทภาชนสมีเป อฏฺฐุปฺปตฺติยํ วุตฺตนเยน. อิมา ปน ฉ สิกฺขาโย สฏฺฐิวสฺสายปิ ปพฺพชิตาย ทาตพฺพาเยว, น เอตาสุ อสิกฺขิตา อุปสมฺปาเทตพฺพา.

ปฐมสิกฺขมานสิกฺขาปทวณฺณนา นิฏฺฐิตา.

๔-๕. ทุติยสิกฺขมานาทิสิกฺขาปทวณฺณนา

ปทภาชเน วุตฺตา อุปสมฺปทาสมฺมุติ น ทินฺนา โหตีติ ปทภาชนสมีเป อฏฺฐุปฺปตฺติยํ วุตฺตา อุปสมฺปทาสมฺมุติ ญตฺติทุติยาย กมฺมวาจาย น ทินฺนา โหติ.

ปญฺจมํ อุตฺตานตฺถเมว.

ทุติยสิกฺขมานาทิสิกฺขาปทวณฺณนา นิฏฺฐิตา.

๖-๑๐. ทุติยคิหิคตาทิสิกฺขาปทวณฺณนา

ทสวสฺสาย คิหิคตาย สิกฺขาสมฺมุตึ ทตฺวา ปริปุณฺณทฺวาทสวสฺสํ อุปสมฺปาเทตุํ วฏฺฏติ.

สตฺตมอฏฺฐมนวมทสมานิ อุตฺตานตฺถาเนว.

ทุติยคิหิคตาทิสิกฺขาปทวณฺณนา นิฏฺฐิตา.

คพฺภินีวคฺโค สตฺตโม.