๖. อารามวคฺโค

๑-๒. อารามปวิสนาทิสิกฺขาปทวณฺณนา

สีสานุโลกิกายาติ สีสํ อนุโลเกนฺติยา. ยตฺถ วา ภิกฺขุนิโย สนฺนิปติตาติ ยตฺถ ภิกฺขุนิโย ปฐมตรํ สชฺฌายนเจติยวนฺทนาทิอตฺถํ สนฺนิปติตา. อาปทาสูติ เกนจิ อุปทฺทุตา โหติ, เอวรูปาสุ อาปทาสุ ปวิสิตุํ วฏฺฏติ.

ทุติยํ อุตฺตานตฺถเมว.

อารามปวิสนาทิสิกฺขาปทวณฺณนา นิฏฺฐิตา.

๓-๔. คณปริภาสนาทิสิกฺขาปทวณฺณนา

เสสนฺติ ‘‘อตฺถธมฺมอนุสาสนิปุเรกฺขารายา’’ติอาทิกํ อวเสสํ. ตตฺถ อนุสาสนิปุเรกฺขารายาติ ‘‘อิทานิปิ ตฺวํ พาลา อพฺยตฺตา’’ติอาทินา (ปาจิ. อฏฺฐ. ๑๐๓๖) นเยน อนุสาสนิปกฺเข ฐตฺวา วทนฺติยา อนาปตฺติ.

จตุตฺถํ อุตฺตานตฺถเมว.

คณปริภาสนาทิสิกฺขาปทวณฺณนา นิฏฺฐิตา.

๕. กุลมจฺฉรินีสิกฺขาปทวณฺณนา

กุเล มจฺฉโร กุลมจฺฉโรติ ปุริมสฺมึ ปกฺเข สกตฺเถ อินีปจฺจโย, ตํ กุลํ อสฺสทฺธํ อปฺปสนฺนนฺติ กุลสฺส อคุณํ, อยสํ วา ภาสนฺติยาติ อตฺโถ. ภิกฺขุนีนํ อวณฺณํ ภาสนฺติยาติ ‘‘ภิกฺขุนิโย ทุสฺสีลา ปาปธมฺมา’’ติ (ปาจิ. อฏฺฐ. ๑๐๔๓) ภิกฺขุนีนํ อคุณํ, อยสํ วา ภาสนฺติยา.

สนฺตํเยว อาทีนวนฺติ กุลสฺส วา ภิกฺขุนีนํ วา สนฺตํเยว อคุณํ.

กุลมจฺฉรินีสิกฺขาปทวณฺณนา นิฏฺฐิตา.

๖-๘. อภิกฺขุกาวาสาทิสิกฺขาปทวณฺณนา

สมนฺตปาสาทิกายํ วุตฺโตติ สมนฺตปาสาทิกาย โอวาทวคฺคสฺส ปฐมสิกฺขาปเท (ปาจิ. อฏฺฐ. ๑๔๔) วุตฺโต.

สตฺตมฏฺฐมานิ อุตฺตานตฺถาเนว.

อภิกฺขุกาวาสาทิสิกฺขาปทวณฺณนา นิฏฺฐิตา.

๙-๑๐. โอวาทูปสงฺกมนาทิสิกฺขาปทวณฺณนา

อุโปสถสฺส ปุจฺฉนํ อุโปสถปุจฺฉา, สาวกปจฺจยํ, รสฺสตฺตญฺจ กตฺวา ‘‘อุโปสถปุจฺฉก’’นฺติ วุตฺตาติ อาห ‘‘อุโปสถปุจฺฉน’’นฺติ. โอวาทตฺถายาติ โอวาทยาจนตฺถาย.

ทสมํ อุตฺตานตฺถเมว.

โอวาทูปสงฺกมนาทิสิกฺขาปทวณฺณนา นิฏฺฐิตา.

อารามวคฺโค ฉฏฺโฐ.