เนตํฐานํวิชฺชติวารวณฺณนา

๑๓๑. ตสฺส ปจฺจยสฺสาติ ผสฺสปจฺจยสฺส ทิฏฺฐิเวทยิเตติ ทิฏฺฐิยา ปจฺจยภูเต เวทยิเต, ผสฺสปธาเนหิ อตฺตโน ปจฺจเยหิ นิปฺผาเทตพฺเพติ อตฺโถ. วินาปิ จกฺขาทิวตฺถูหิ, สมฺปยุตฺตธมฺเมหิ จ เกหิจิ เวทนา อุปฺปชฺชติ, น ปน กทาจิ ผสฺเสน วินาติ ผสฺโส เวทนาย พลวการณนฺติ อาห ‘‘พลวภาวทสฺสนตฺถ’’นฺติ. สนฺนิหิโตปิ หิ วิสโย สเจ ผุสนาการรหิโต โหติ จิตฺตุปฺปาโท, น ตสฺส อารมฺมณปจฺจเยน ปจฺจโย โหตีติ ผสฺโสว สมฺปยุตฺตธมฺมานํ วิเสสปจฺจโย. ตถา หิ ภควตา จิตฺตุปฺปาทํ วิภชนฺเตน ผสฺโสเยว ปฐมํ อุทฺธโฏ, เวทนาย ปน อธิฏฺฐานเมว.