๘-๑๐. ลิจฺฉวิกุมารกสุตฺตาทิวณฺณนา

๕๘-๖๐. อฏฺฐเม สาปเตยฺยนฺติ เอตฺถ สํ วุจฺจติ ธนํ, ตสฺส ปตีติ สปติ, ธนสามิโก. ตสฺส หิตาวหตฺตา สาปเตยฺยํ, ทฺรพฺยํ, ธนนฺติ อตฺโถ. อตฺตโน รุจิวเสน คามกิจฺจํ เนตีติ คามนิโย, คามนิโยเยว คามณิโก.

อนฺวาย อุปนิสฺสาย ชีวนสีลา อนุชีวิโนติ อาห ‘‘เย จ เอตํ อุปนิสฺสาย ชีวนฺตี’’ติ. เอกํ มหากุลํ นิสฺสาย ปณฺณาสมฺปิ สฏฺฐิปิ กุลานิ ชีวนฺติ, เต มนุสฺเส สนฺธาเยตํ วุตฺตํ. เสสํ สุวิญฺเญยฺยเมว. นวมาทีนิ อุตฺตานตฺถาเนว.

ลิจฺฉวิกุมารกสุตฺตาทิวณฺณนา นิฏฺฐิตา.

นีวรณวคฺควณฺณนา นิฏฺฐิตา.