สตฺตวีสติโม ปริจฺเฉโท

๑๐๖๒. จิตฺตํ เจตสิกํ รูปํ, นิพฺพานมฺปิ จ ภาชิตํ;

ตสฺมา ทานิ ยถาโยคํ, ปญฺญตฺติปิ ปวุจฺจติ.

๑๐๖๓. สา จายํ อตฺถปญฺญตฺติ-นามปญฺญตฺติเภทโต;

ทุวิธา โหติ ปญฺญตฺติ, อตฺถปญฺญตฺติ ตตฺถ จ.

๑๐๖๔. สตฺตสมฺภารสณฺฐาน-สงฺฆาฏปริณามโต;

วิกปฺปุปฏฺฐานาการโวหาราภินิเวสโต.

๑๐๖๕. ตถา ปวตฺตสงฺเกตสิทฺธา อตฺถา ปกปฺปิตา;

ปญฺญาปียนฺติ นามาติ, ปญฺญตฺตีติ ปกิตฺติตา.

๑๐๖๖. อตฺถา หิ ปรมตฺถตฺถา, ปญฺญตฺตตฺถาติ จ ทฺวิธา;

ตตฺถ จ ปรมตฺถตฺถา, สจฺจิกฏฺฐา สลกฺขณา.

๑๐๖๗. ปญฺญตฺตตฺถา สจฺจิกฏฺฐสลกฺขณสภาวโต;

อญฺญถา คหิตา ตํตมุปาทาย ปกปฺปิตา.

๑๐๖๘. ตสฺมา อุปาทาปญฺญตฺติ, อตฺถปญฺญตฺตินามกา;

ปญฺญเปตพฺพนามาว, ปญฺญตฺตตฺถาว สพฺพถา.

๑๐๖๙. ปรมตฺถา ยถาวุตฺตา, จิตฺตเจตสิกาทโย;

ปญฺญตฺตา อิตฺถิปุริสมญฺจปีฐปฏาทโย.

๑๐๗๐. เยน วุจฺจติ ตํ นามํ, ปญฺญเปตีติ วุจฺจติ;

ปญฺญตฺตีติ จ สา นามปญฺญตฺตีติ ตโต มตา.

๑๐๗๑. สงฺขา สมญฺญา ปญฺญตฺติ, โวหาโรติ จ ภาชิตา;

จตุธา ปญฺญเปตพฺพปญฺญตฺตีติ หิ วณฺณิตา.

๑๐๗๒. ตโต นามํ นามกมฺมํ, นามเธยฺยํ อถาปรํ;

นิรุตฺติ พฺยญฺชนมภิลาโปติ ปน ภาชิตา.

๑๐๗๓. นามปญฺญตฺติ นามาติ, ปญฺญตฺติ ทุวิธา กตา;

สพฺเพว ธมฺมา ปญฺญตฺติปถาติ ปน ภาชิตา.

๑๐๗๔. ปรมตฺถปญฺญตฺตตฺถา, ทุวิธา โหนฺติ ตตฺถ จ;

ปญฺญตฺติปถาว โหนฺติ, ปรมตฺถา สลกฺขณา.

๑๐๗๕. ปญฺญตฺตตฺถา ปญฺญตฺติ จ, ปญฺญเปตพฺพมตฺตโต;

ปญฺญตฺติปถา จ นามปญฺญตฺติปถภาวโต.

๑๐๗๖. นามมฺปิ ปญฺญาเปตพฺพเมว กิญฺจาปิ เกนจิ;

นามเมวมฺเปตํ ตตฺถ, ปญฺญตฺติจฺเจว วณฺณิตํ.

๑๐๗๗. ปญฺญเปตพฺพธมฺมา จ, เตสํ ปญฺญาปิตาปิ จ;

อิจฺฉิตพฺพาปิ ปญฺญตฺติปถา ปญฺญตฺตินานตา.

๑๐๗๘. อิติ วุตฺตานุสาเรน, วุตฺตํ อฏฺฐกถานเย;

นยํ คเหตฺวา เอตฺถาปิ, ปญฺญตฺติ ทุวิธา กตา.

๑๐๗๙. ตสฺมิมฺปิ ปรมตฺถา จ, สจฺจิกฏฺฐสลกฺขณา;

อตฺถา ปญฺญตฺติมตฺตา จ, อตฺถปญฺญตฺตินามกา.

๑๐๘๐. เตสํ ปญฺญาปิกา เจว, นามปญฺญตฺตินามิกา;

อิจฺเจวํ วณฺณนามคฺเค, เญยฺยตฺตา ติวิธา กตา.

๑๐๘๑. ปรมตฺถสจฺจํ นาม, ปรมตฺถาว ตตฺถ จ;

สจฺจิกฏฺฐสภาวตฺตา, อวิสํวาทกา หิ เต.

๑๐๘๒. สมฺมุติสจฺจํ ปญฺญตฺติทฺวยํ โวหารวุตฺติยา;

โลกสมญฺญาธิปฺปายาวิสํวาทกภาวโต.

๑๐๘๓. อิติ สจฺจทฺวยมฺเปตํ, อกฺขาสิ ปุริสุตฺตโม;

เตนาปิ นามสํวิญฺญู, โวหเรยฺยุภยมฺปิ วา.

อิติ ปญฺญตฺติวิภาเค ปเภทกถา นิฏฺฐิตา.

สตฺตวีสติโม ปริจฺเฉโท.