๙. นวโม ปริจฺเฉโท

ทสานุสฺสติวิภาโค

๑๑๐๐. สทฺธาปพฺพชิโต โยคี, ภาเวนฺโตนุสฺสตึ ปน;

ทสานุสฺสติเภเทสุ, ภาเวยฺยญฺญตรํ กถํ.

๑๑๐๑. อรหํ สุคโต โลเก, ภควา โลกปารคู;

วิชฺชาจรณสมฺปนฺโน, วิมุตฺติปรินายโก.

๑๑๐๒. เชฏฺโฐ สมฺมาภิสมฺพุทฺโธ, เสฏฺโฐ ปุริสสารถี;

สตฺถา เทวมนุสฺสานํ, พุทฺโธ อปฺปฏิปุคฺคโล.

๑๑๐๓. สพฺพโลกหิโต พนฺธุ, สมตฺตรตนาลโย;

สตฺตานมนุกมฺปาย, ชาโต นาโถ สิวํกโร.

๑๑๐๔. จกฺขุมา ติตฺถกุสโล, ธมฺมสฺสามี ตถาคโต;

มจฺจุเธยฺยวิโมกฺขาย, ปฏิปาทยิ ปาณิโน.

๑๑๐๕. สตฺถวาโห มหาโยคฺโค, มคฺคามคฺคยุธนฺธโร;

สิริสตฺถมธิคฺคยฺห, วิจริตฺถ มหาปถํ,

๑๑๐๖. อโนโม อสโม ธีโร,

โลกหีตปรกฺกโม;

สพฺพาการวโรเปโต,

อจฺเฉรพฺภุตปุคฺคโล.

๑๑๐๗. อตฺถภูโต ธมฺมภูโต,

พฺรหฺมภูโต มหายโส;

ญาณาโลกปริจฺฉินฺน-

เญยฺยาเสสปริคฺคโห.

๑๑๐๘. อานุภาววสิปฺปตฺโต, อาสภณฺฑานนิจฺจโล;

มหนฺตมริยาโทยมนนฺตคติโคจโร.

๑๑๐๙. สพฺพา ภิญฺญาพลปฺปตฺโต, เวสารชฺชวิสารโท;

สพฺพสมฺปตฺตินิฏฺฐาโน, คุณปารมิปูรโก.

๑๑๑๐. อปฺปเมยฺโย มหานาโค, มหาวีโร มหามุนิ;

มเหสี มหิตาจาโร, มหามโห มหิทฺธิโก.

๑๑๑๑. สพฺพตฺถสิทฺธิสญฺจาโร, มเหสีคณปูชิโต;

ราชาธิราชมหิโต, เทวพฺรหฺมาภิวนฺทิโต.

๑๑๑๒. อภิภูย ตโย โลเก, อาทิจฺโจว นภนฺตเร;

วิโรจติ มหาเตโช, อนฺธกาเร ปภงฺกโร.

๑๑๑๓. พฺยามปฺปภาปริกฺขิตฺโต, เกตุมาลาหลงฺกโต;

ทฺวตฺตึสลกฺขณาสีติอนุพฺยญฺชนโสภิโต.

๑๑๑๔. ฉพฺพณฺณรํสิลลิโต, รตนคฺฆิยสนฺนิโภ;

สมิทฺธิรูปโสภคฺโค, ทสฺสเนยฺยํว ปิณฺฑิตํ.

๑๑๑๕. ผุลฺลํ ปทุมสณฺฑํว, กปฺปรุกฺโขวลงฺกโต;

นภํว ตารกากิณฺณํ, อุตฺตโม ปฏิทิสฺสติ.

๑๑๑๖. สตฺถุกปฺปมหาวีรปุตฺเตหิ ปริวาริโต;

สพฺพโลกมหิทฺธาย, ธมฺมราชา สยํวสี.

๑๑๑๗. นิทฺโธตมลจนฺโทว, นกฺขตฺตปริวาริโต;

ขตฺตสงฺฆปริพฺยุโฬฺห, จกฺกวตฺตีว โสภติ.

๑๑๑๘. อิจฺจานนฺตคุณากิณฺณมเสสมลนิสฺสฏํ;

สพฺพสมฺปตฺติทาตารํ, วิปตฺติวินิพนฺธกํ.

๑๑๑๙. ทยาปรมโหรตฺตํ, ภควนฺตมนุสฺสรํ;

ภาเวติ ปญฺญวา โยคี, พุทฺธานุสฺสติภาวนํ.

๑๑๒๐. สฺวาขาโต เตน สทฺธมฺโม, สมฺพุทฺเธน สตีมตา;

ปจฺจตฺตปฏิเวเธน, ปสฺสิตพฺโพ ยถารหํ.

๑๑๒๑. ตณฺหาทลิทฺทนาสาย, มโนรถสมิทฺธิยา;

กาลนฺตรมนาคมฺม, ปจฺจกฺขผลทายโก.

๑๑๒๒. อุปนิสฺสยวนฺตานํ, ‘‘เอหิ ปสฺสา’’ติ ทสฺสิโย;

ปจฺจตฺตเมว วิญฺญูหิ, เวทิตพฺโพ สภาวโต.

๑๑๒๓. สพฺพาสวสมุคฺฆาตี, สุทฺโธ โสวตฺถิโก สิโว;

ปิหิตาปายกุมฺมคฺโค, มคฺโค นิพฺพานปตฺติยา.

๑๑๒๔. เกฺลสสํกฏทุคฺคมฺหา, ทุกฺขกฺขนฺธมหพฺภยา;

เขมนฺตภูมึ นิยฺยาติ, อจฺจนฺตมนุปทฺทวํ.

๑๑๒๕. ปุญฺญติตฺถมิทํ นาม, มงฺคลญฺจ สิวงฺกรํ;

หิโตทยสุขาธาน-มมตาหารมุตฺตมํ.

๑๑๒๖. อวิชฺชาปฏลุทฺธารวิชฺชาเนตฺโตสธํ วรํ;

ปญฺญาธารมิทํ สตฺถํ, เกฺลสคณฺฑปฺปเภทกํ.

๑๑๒๗. จตุโรฆนิมุคฺคานํ, เสตุพนฺโธ สมุคฺคโต;

ภวจารกรุทฺธานํ, มหาทฺวาโร อปารุโต.

๑๑๒๘. โสโกปายาสวิทฺธานํ, ปริเทวสมงฺคินํ;

สลฺลนีหรโณปาโย, อจฺจนฺตสุขมีริโต.

๑๑๒๙. พฺยสโนปทฺทวาเปโต, สํเกฺลสมลนิสฺสโฏ;

อุชุสมฺมตฺตนิยโต, ปฏิปตฺติวิสุทฺธิยา.

๑๑๓๐. สุทฺธสีลปริกฺขาโร, สมาธิมยปญฺชโร;

สมฺมาสงฺกปฺปจกฺกงฺโค, สมฺมาวายามวาหโน.

๑๑๓๑. สติสารถิสํยุตฺโต, สมฺมาทิฏฺฐิปุเรชโว;

เอส ธมฺมรโถ ยาติ, โยคกฺเขมสฺส ปตฺติยา.

๑๑๓๒. วิปตฺติปฏิพาหาย, สพฺพสมฺปตฺติสิทฺธิยา;

สพฺพขนฺธวิโมกฺขาย, ธมฺมํ เทเสสิ จกฺขุมา.

๑๑๓๓. หิเตสี สพฺพปาณีนํ, ทยาปนฺโน มหามุนิ;

ธมฺมาโลกํ ปกาเสสิ, จกฺขุมนฺตานมุตฺตโม.

๑๑๓๔. ยํ ธมฺมํ สมฺมทญฺญาย, เขมมคฺคปฺปติฏฺฐิตา;

ปาปกาปคตา ธีรา, ปสฺสทฺธิทรถาสยา.

๑๑๓๕. ภวโยคา วินิมุตฺตา, ปหีนภยเภรวา;

อจฺจนฺตสุขเมเธนฺติ, โสตฺถิปตฺตา มเหสโย.

๑๑๓๖. ตเมวมุตฺตมํ ธมฺมํ, จินฺเตนฺโต ปน ปณฺฑิโต;

ภาเวตีติ ปกาเสนฺติ, ธมฺมานุสฺสติภาวนํ.

๑๑๓๗. จตฺตาโร จ ปฏิปนฺนา, จตฺตาโร จ ผเล ฐิตา;

เอส สงฺโฆ อุชุภูโต, ปญฺญาสีลสมาหิโต.

๑๑๓๘. ปลาปาปคโต สุทฺโธ, ปฏิปตฺติปติฏฺฐิโต;

ปริคฺคหิตสทฺธมฺโม, สมิทฺธิคุณโสภิโต.

๑๑๓๙. ปหีนาปายคมโน, ปาปเกฺลสวินิสฺสโฏ;

ปริปนฺถสมุจฺเฉที, ภวจารกเภทโก.

๑๑๔๐. อุตฺตมทมถปฺปตฺโต, สุวินีโต มเหสินา;

วิชฺชาวิมุตฺติโวทาโต, อาชานียปเถ ฐิโต.

๑๑๔๑. สุคโตรสิ สมฺภูโต, สุจิธมฺมสิรินฺธโร;

ปฏิปาทิตสมฺปตฺโต, ธมฺมสาสนเสวิโต.

๑๑๔๒. ภยเภรวนิสฺสงฺโค, ชินเตชานุปาลิโต;

โมเนยฺยปถสญฺจาโร, สุคโตวาทภาชโน.

๑๑๔๓. อปฺปมาทปริตฺตาโณ, สีลาลงฺการภูสิโต;

เจโตสมาธิสนฺนทฺโธ, ปญฺญายุธสมุชฺชโล.

๑๑๔๔. อุชุมคฺคมธิฏฺฐาย, มารกายปฺปทาลโน;

อปราชิตสงฺคาโม, ลลิโตทาตวิกฺกโม.

๑๑๔๕. มจฺจุเธยฺยมติกฺกนฺโต, โพธิธมฺมปฺปติฏฺฐิโต;

ฉฬาภิญฺญาพลปฺปตฺโต, สมาราธิตสาสโน.

๑๑๔๖. อนุโพธิมนุปฺปตฺโต, ปภินฺนปฏิสมฺภิโท;

สามญฺญปารมิปฺปตฺโต, โตเสติ ชินมานสํ.

๑๑๔๗. เนกาการวรูเปโต, นานาสมฺปตฺติผุลฺลิโต;

วิปตฺติปถนิตฺติณฺโณ, อภิพุทฺธิปรายโณ.

๑๑๔๘. อาหุเนยฺโย ปาหุเนยฺโย,

ทกฺขิเณยฺโย สุทุลฺลโภ;

สเทวกสฺส โลกสฺส,

ปุญฺญกฺเขตฺตมนุตฺตรํ.

๑๑๔๙. ยตฺถ สุทฺธิมฺหิ นิทฺโทเส, สทฺธาพีชํ ปติฏฺฐิตํ;

อจฺจนฺตํ ปริปาเจติ, สมฺปตฺติผลมุตฺตมํ.

๑๑๕๐. ยํ ผลํ ปริภุญฺชนฺตา, วิมุตฺติรสเสวนํ;

อจฺจนฺตสุขิตา ธีรา, ภวนฺติ อชรามรา.

๑๑๕๑. ตํ ผลํ ปตฺถยนฺเตน, สงฺฆานุสฺสติภาวนา;

ภาเวตพฺพา ปนิจฺเจวมิติ ภาสนฺติ ปณฺฑิตา.

๑๑๕๒. ปญฺจสีลํ ทสสีลํ, ปาติโมกฺขมุโปสถํ;

จาตุปาริสุทฺธิสีลํ, ธุตงฺคปริวาริตํ.

๑๑๕๓. เอวเมเตสุ ยํ กิญฺจิ, สมาทาย รโหคโต;

ตมานิสํสํ คุณโต, ผลโต จ วิจินฺตเย.

๑๑๕๔. อาทิ เจตํ ปติฏฺฐา จ, มุขํ ปมุขมุตฺตมํ;

มูลํ กุสลธมฺมานํ, ปภวํ ปฏิปตฺติยา.

๑๑๕๕. สาสโนตรณทฺวารํ, ติตฺถํ สทฺธมฺมวาปิยา;

ปาริสุทฺธิปทฏฺฐานํ, มคฺโค เขมนฺตปาปโก.

๑๑๕๖. สาธุ สิกฺขาสมาทานํ, พาหุสจฺจวิภูสนํ;

อริยาจารจาริตฺต-มวณฺณมลวชฺชนํ.

๑๑๕๗. กุลปุตฺตอลงฺกาโร, ปาปชลฺลปวาหนํ;

อนปายิ สุคนฺธญฺจ, มหาปุริสเสวิตํ.

๑๑๕๘. ปจฺฉานุตาปหรณํ, ปีติปาโมชฺชวฑฺฒนํ;

เนกฺขมฺมภาวโนเปตํ, ปพฺพชฺชาเวสโสภนํ.

๑๑๕๙. โสปานํ สคฺคโลกสฺส, ทฬฺหาปายวิธานกํ;

อนุปทฺทวสมฺปตฺติ, สมตฺถคุณสูทนี.

๑๑๖๐. เกฺลสปญฺชรวิจฺเฉทิ, วิปตฺติปถวารณํ;

โสตฺถิกมฺมสมุฏฺฐานํ, อสาธารณมงฺคลํ.

๑๑๖๑. ‘‘สุลทฺธา วต เม ลทฺธา, สทฺธา สุคตสาสเน;

สีลํ เม ยสฺส กลฺยาณํ, ปริสุทฺธมขณฺฑิตํ.

๑๑๖๒. ‘‘ทุลฺลโภ วต เม ลทฺโธ,

มหาลาโภ อนปฺปโก;

โยหมกฺขลิตาจาโร,

อุปฆาตวิวชฺชิโต.

๑๑๖๓. ‘‘ธมฺมงฺกุริตสนฺตาโน, มูลชาโตสฺมิ สาสเน;

อุชุมคฺคํ สมารุโฬฺห, ปิหิตา สภยา ทิสา.

๑๑๖๔. ‘‘อวญฺจา วต เม ชาติ, อารทฺธา ขณสมฺปทา;

ปติฏฺฐิโตมฺหิ สทฺธมฺเม, สผลํ มม ชีวิตํ’’.

๑๑๖๕. อิตฺถํ นานปฺปกาเรน, จินฺเตนฺโต คุณมตฺตโน;

สีลกฺขนฺธสฺส ภาเวติ, สีลานุสฺสติภาวนํ.

๑๑๖๖. สทฺธาย สีลวนฺเตสุ, ทตฺวา ทานํ ยถารหํ;

นิทฺโธตมลมจฺเฉโร, วิวิตฺโต ตมนุสฺสเร.

๑๑๖๗. ทานํ นิธานมนุคํ, อสาธารณมุตฺตมํ;

อวินาสสุขาธานํ, อจฺจนฺตํ สพฺพกามทํ.

๑๑๖๘. โกปทาโหปสมนํ, มจฺเฉรมลโสธนํ;

ปมาทนิทฺทาวุฏฺฐานํ, โลภปาสวิโมจนํ.

๑๑๖๙. เจโตวิการทมนํ, มิจฺฉามคฺคนิวารณํ;

วิตฺติลาภสุขสฺสาโท, วิภโวทยมงฺคลํ.