๘. ปุณฺณิกาเถรีอปทานํ

๑๘๔. ‘‘วิปสฺสิโน ภควโต, สิขิโน เวสฺสภุสฺส จ;

กกุสนฺธสฺส มุนิโน, โกณาคมนตาทิโน.

๑๘๕. ‘‘กสฺสปสฺส จ พุทฺธสฺส, ปพฺพชิตฺวาน สาสเน;

ภิกฺขุนี สีลสมฺปนฺนา, นิปกา สํวุตินฺทฺริยา.

๑๘๖. ‘‘พหุสฺสุตา ธมฺมธรา, ธมฺมตฺถปฏิปุจฺฉิกา;

อุคฺคเหตา จ ธมฺมานํ, โสตา ปยิรุปาสิตา.

๑๘๗. ‘‘เทเสนฺตี ชนมชฺเฌหํ, อโหสึ ชินสาสเน;

พาหุสจฺเจน เตนาหํ, เปสลา อติมญฺญิสํ.

๑๘๘. ‘‘ปจฺฉิเม จ ภเว ทานิ, สาวตฺถิยํ ปุรุตฺตเม;

อนาถปิณฺฑิโน เคเห, ชาตาหํ กุมฺภทาสิยา.

๑๘๙. ‘‘คตา อุทกหาริยํ, โสตฺถิยํ ทิชมทฺทสํ;

สีตฏฺฏํ โตยมชฺฌมฺหิ, ตํ ทิสฺวา อิทมพฺรวึ.

๑๙๐. ‘‘‘อุทหารี อหํ สีเต, สทา อุทกโมตรึ;

อยฺยานํ ทณฺฑภยภีตา, วาจาโทสภยฏฺฏิตา [วาจาโรสภยฏฺฏิตา (สฺยา.)].

๑๙๑. ‘‘‘กสฺส พฺราหฺมณ ตฺวํ ภีโต, สทา อุทกโมตริ;

เวธมาเนหิ คตฺเตหิ, สีตํ เวทยเส ภุสํ’.

๑๙๒. ‘‘‘ชานนฺตี วต มํ โภติ, ปุณฺณิเก ปริปุจฺฉสิ;

กโรนฺตํ กุสลํ กมฺมํ, รุนฺธนฺตํ [นิทฺธนฺตํ (สี. ปี.), นุทนฺตํ (สฺยา.)] กตปาปกํ.

๑๙๓. ‘‘‘โย เจ วุฑฺโฒ ทหโร วา, ปาปกมฺมํ ปกุพฺพติ;

ทกาภิสิญฺจนา โสปิ [โภติ (สี. ก.) เถรีคา. ๒๓๙], ปาปกมฺมา ปมุจฺจติ’.

๑๙๔. ‘‘อุตฺตรนฺตสฺส อกฺขาสึ, ธมฺมตฺถสํหิตํ ปทํ;

ตญฺจ สุตฺวา ส สํวิคฺโค [สุสํวิคฺโค (สฺยา.)], ปพฺพชิตฺวารหา อหุ.

๑๙๕. ‘‘ปูเรนฺตี อูนกสตํ, ชาตา ทาสิกุเล ยโต;

ตโต ปุณฺณาติ นามํ เม, ภุชิสฺสํ มํ อกํสุ เต.

๑๙๖. ‘‘เสฏฺฐึ ตโตนุชาเนตฺวา [ตโต อนุโมเทตฺวา (สี. สฺยา.), ตโต อนุมาเนตฺวา (ปี.)], ปพฺพชึ อนคาริยํ;

น จิเรเนว กาเลน, อรหตฺตมปาปุณึ.

๑๙๗. ‘‘อิทฺธีสุ จ วสี โหมิ, ทิพฺพาย โสตธาตุยา;

เจโตปริยญาณสฺส, วสี โหมิ มหามุเน.

๑๙๘. ‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;

สพฺพาสวปริกฺขีณา, นตฺถิ ทานิ ปุนพฺภโว.

๑๙๙. ‘‘อตฺถธมฺมนิรุตฺตีสุ, ปฏิภาเน ตเถว จ;

ญาณํ เม วิมลํ สุทฺธํ, พุทฺธเสฏฺฐสฺส วาหสา.

๒๐๐. ‘‘ภาวนาย มหาปญฺญา, สุเตเนว สุตาวินี;

มาเนน นีจกุลชา, น หิ กมฺมํ วินสฺสติ [ปนสฺสติ (สฺยา.)].

๒๐๑. ‘‘กิเลสา ฌาปิตา มยฺหํ…เป… วิหรามิ อนาสวา.

๒๐๒. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๒๐๓. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ ปุณฺณิกา ภิกฺขุนี อิมา คาถาโย อภาสิตฺถาติ.

ปุณฺณิกาเถริยาปทานํ อฏฺฐมํ.