๓. อุปฺปลทายิกาเถรีอปทานํ

๕๗. ‘‘นคเร อรุณวติยา, อรุโณ นาม ขตฺติโย;

ตสฺส รญฺโญ อหุํ ภริยา, เอกชฺฌํ จารยามหํ.

๕๘. ‘‘รโหคตา นิสีทิตฺวา, เอวํ จินฺเตสหํ ตทา;

‘กุสลํ เม กตํ นตฺถิ, อาทาย คมิยํ มม.

๕๙. ‘‘‘มหาภิตาปํ กฏุกํ, โฆรรูปํ สุทารุณํ;

นิรยํ นูน คจฺฉามิ, เอตฺถ เม นตฺถิ สํสโย’.

๖๐. ‘‘เอวาหํ จินฺตยิตฺวาน, ปหํเสตฺวาน มานสํ;

ราชานํ อุปคนฺตฺวาน, อิทํ วจนมพฺรวึ.

๖๑. ‘‘‘อิตฺถี นาม มยํ เทว, ปุริสานิตฺตรา อหุ [ปุริสานุคตา สทา (สี.), ปุริสา น ภวาม โน (สฺยา.), ปุริสานํ ภรา มยํ (ปี.)];

เอกํ เม สมณํ เทหิ, โภชยิสฺสามิ ขตฺติย’.

๖๒. ‘‘อทาสิ เม ตทา ราชา, สมณํ ภาวิตินฺทฺริยํ;

ตสฺส ปตฺตํ คเหตฺวาน, ปรมนฺเนน ปูรยึ.

๖๓. ‘‘ปูเรตฺวา ปรมํ อนฺนํ, สห สุคนฺธเลปนํ;

มหาเจเลน ฉาทิตฺวา, อทาสึ ตุฏฺฐมานสา.

๖๔. ‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวตึสมคจฺฉหํ.

๖๕. ‘‘สหสฺสเทวราชูนํ, มเหสิตฺตมการยึ;

สหสฺสจกฺกวตฺตีนํ, มเหสิตฺตมการยึ.

๖๖. ‘‘ปเทสรชฺชํ วิปุลํ, คณนาโต อสงฺขิยํ;

นานาวิธํ พหุํ อญฺญํ, ตสฺส กมฺมผลํ ตโต.

๖๗. ‘‘อุปฺปลสฺเสว เม วณฺโณ, อภิรูปา สุทสฺสนา;

อิตฺถิสพฺพงฺคสมฺปนฺนา, อภิชาตา ชุตินฺธรา.

๖๘. ‘‘ปจฺฉิเม ภเว สมฺปตฺเต, อชายึ สากิเย กุเล;

นารีสหสฺสปาโมกฺขา, สุทฺโธทนสุตสฺสหํ.

๖๙. ‘‘นิพฺพินฺทิตฺวา อคาเรหํ, ปพฺพชึ อนคาริยํ;

สตฺตมีรตฺติสมฺปตฺตา [สตฺตมึรตฺติมปตฺตา (สี. สฺยา. ปี.)], จตุสจฺจมปาปุณึ.

๗๐. ‘‘จีวรํ ปิณฺฑปาตญฺจ, ปจฺจยํ สยนาสนํ;

ปริเมตุํ น สกฺโกมิ, ปิณฺฑปาตสฺสิทํ ผลํ.

๗๑. ‘‘ยํ มยฺหํ ปูริตํ กมฺมํ, กุสลํ สรเส มุนิ;

ตุยฺหตฺถาย มหาวีร, ปริจตฺตํ พหุํ มยา.

๗๒. ‘‘เอกตฺตึเส อิโต กปฺเป, ยํ ทานมททึ ตทา;

ทุคฺคตึ นาภิชานามิ, ปิณฺฑปาตสฺสิทํ ผลํ.

๗๓. ‘‘เทฺว คติโย ปชานามิ, เทวตฺตํ อถ มานุสํ;

อญฺญํ คตึ น ชานามิ, ปิณฺฑปาตสฺสิทํ ผลํ.

๗๔. ‘‘อุจฺเจ กุเล ปชายามิ, มหาสาเล [ตโย สาล (ก.)] มหทฺธเน;

อญฺเญ กุเล น ชายามิ, ปิณฺฑปาตสฺสิทํ ผลํ.

๗๕. ‘‘ภวาภเว สํสริตฺวา, สุกฺกมูเลน โจทิตา;

อมนาปํ น ปสฺสามิ, โสมนสฺสกตํ ผลํ.

๗๖. ‘‘อิทฺธีสุ จ วสี โหมิ, ทิพฺพาย โสตธาตุยา;

เจโตปริยญาณสฺส, วสี โหมิ มหามุเน.

๗๗. ‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;

สพฺพาสวปริกฺขีณา, นตฺถิ ทานิ ปุนพฺภโว.

๗๘. ‘‘อตฺถธมฺมนิรุตฺตีสุ, ปฏิภาเน ตเถว จ;

ญาณํ มม มหาวีร, อุปฺปนฺนํ ตว สนฺติเก.

๗๙. ‘‘กิเลสา ฌาปิตา มยฺหํ…เป… วิหรามิ อนาสวา.

๘๐. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๘๑. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อุปฺปลทายิกา ภิกฺขุนี ภควโต สมฺมุขา อิมา คาถาโย อภาสิตฺถาติ.

อุปฺปลทายิกาเถริยาปทานํ ตติยํ.