๔. สิงฺคาลมาตุเถรีอปทานํ

๘๒. ‘‘ปทุมุตฺตโร นาม ชิโน, สพฺพธมฺมาน ปารคู;

อิโต สตสหสฺสมฺหิ, กปฺเป อุปฺปชฺชิ นายโก.

๘๓. ‘‘ตทาหํ หํสวติยํ, ชาตามจฺจกุเล อหุํ;

นานารตนปชฺโชเต, อิทฺเธ ผีเต มหทฺธเน.

๘๔. ‘‘ปิตุนา สห คนฺตฺวาน, มหาชนปุรกฺขตา;

ธมฺมํ พุทฺธสฺส สุตฺวาน, ปพฺพชึ อนคาริยํ.

๘๕. ‘‘ปพฺพชิตฺวาน กาเยน, ปาปกมฺมํ วิวชฺชยึ;

วจีทุจฺจริตํ หิตฺวา, อาชีวํ ปริโสธยึ.

๘๖. ‘‘พุทฺเธ ปสนฺนา ธมฺเม จ, สงฺเฆ จ ติพฺพคารวา;

สทฺธมฺมสฺสวเน ยุตฺตา, พุทฺธทสฺสนลาลสา [พุทฺธทสฺสนสาลยา (สฺยา.)].

๘๗. ‘‘อคฺคํ สทฺธาธิมุตฺตานํ, อสฺโสสึ ภิกฺขุนึ ตทา;

ตํ ฐานํ ปตฺถยิตฺวาน, ติสฺโส สิกฺขา อปูรยึ.

๘๘. ‘‘ตโต มํ สุคโต อาห, กรุณานุคตาสโย;

‘ยสฺส สทฺธา ตถาคเต, อจลา สุปฺปติฏฺฐิตา;

สีลญฺจ ยสฺส กลฺยาณํ, อริยกนฺตํ ปสํสิตํ.

๘๙. ‘‘‘สงฺเฆ ปสาโท ยสฺสตฺถิ, อุชุภูตญฺจ ทสฺสนํ;

อทลิทฺโทติ ตํ อาหุ, อโมฆํ ตสฺส ชีวิตํ.

๙๐. ‘‘‘ตสฺมา สทฺธญฺจ สีลญฺจ, ปสาทํ ธมฺมทสฺสนํ;

อนุยุญฺเชถ เมธาวี, สรํ พุทฺธาน [พุทฺธานุสาสนํ (สี.), พุทฺธานํ สาสนํ (สฺยา.)] สาสนํ’.

๙๑. ‘‘ตํ สุตฺวาหํ ปมุทิตา, อปุจฺฉึ ปณิธึ มม;

ตทา อโนโม อมิโต, พฺยากริตฺถ วินายโก;

‘พุทฺเธ ปสนฺนา กลฺยาณี, ลจฺฉเส ตํ สุปตฺถิตํ.

๙๒. ‘‘‘สตสหสฺสิโต กปฺเป, โอกฺกากกุลสมฺภโว;

โคตโม นาม โคตฺเตน, สตฺถา โลเก ภวิสฺสติ.

๙๓. ‘‘‘ตสฺส ธมฺเมสุ ทายาทา, โอรสา ธมฺมนิมฺมิตา;

สิงฺคาลกสฺส [สิคาลกสฺส (สี. ปี.)] มาตาติ, เหสฺสติ สตฺถุ สาวิกา’.

๙๔. ‘‘ตํ สุตฺวา มุทิตา หุตฺวา, ยาวชีวํ ตทา ชินํ;

เมตฺตจิตฺตา ปริจรึ, ปฏิปตฺตีหิ นายกํ.

๙๕. ‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวตึสมคจฺฉหํ.

๙๖. ‘‘ปจฺฉิเม จ ภเว ทานิ, คิริพฺพชปุรุตฺตเม;

ชาตา เสฏฺฐิกุเล ผีเต, มหารตนสญฺจเย.

๙๗. ‘‘ปุตฺโต สิงฺคาลโก นาม, มมาสิ วิปเถ รโต;

ทิฏฺฐิคหนปกฺขนฺโท, ทิสาปูชนตปฺปโร.

๙๘. ‘‘นานาทิสา นมสฺสนฺตํ [นมสฺสติ (สฺยา.)], ปิณฺฑาย นครํ วชํ;

ตํ ทิสฺวา โอวที พุทฺโธ, มคฺเค ฐตฺวา วินายโก.

๙๙. ‘‘ตสฺส เทสยโต ธมฺมํ, ปนาโท วิมฺหโย อหุ;

เทฺวโกฏินรนารีนํ, ธมฺมาภิสมโย อหุ.

๑๐๐. ‘‘ตทาหํ ปริสํ คนฺตฺวา, สุตฺวา สุคตภาสิตํ;

โสตาปตฺติผลํ ปตฺตา, ปพฺพชึ อนคาริยํ.

๑๐๑. ‘‘น จิเรเนว กาเลน, พุทฺธทสฺสนลาลสา;

อนุสฺสตึ ตํ ภาเวตฺวา, อรหตฺตมปาปุณึ.

๑๐๒. ‘‘ทสฺสนตฺถาย พุทฺธสฺส, สพฺพทา จ วชามหํ;

อติตฺตาเยว ปสฺสามิ, รูปํ นยนนนฺทนํ.

๑๐๓. ‘‘สพฺพปารมิสมฺภูตํ, ลกฺขีนิลยนํ วรํ;

รูปํ สพฺพสุภากิณฺณํ, อติตฺตา วิหรามหํ.

๑๐๔. ‘‘ชิโน ตสฺมึ คุเณ ตุฏฺโฐ, เอตทคฺเค ฐเปสิ มํ;

สิงฺคาลกสฺส ยา มาตา, อคฺคา สทฺธาธิมุตฺติกา [สํฆวิมุตฺติกา (ปี.), มมาธิมุตฺติกา (ก.)].

๑๐๕. ‘‘อิทฺธีสุ จ วสี โหมิ, ทิพฺพาย โสตธาตุยา;

เจโตปริยญาณสฺส, วสี โหมิ มหามุนิ.

๑๐๖. ‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;

สพฺพาสวปริกฺขีณา, นตฺถิ ทานิ ปุนพฺภโว.

๑๐๗. ‘‘อตฺถธมฺมนิรุตฺตีสุ, ปฏิภาเน ตเถว จ;

ญาณํ มม มหาวีร, อุปฺปนฺนํ ตว สนฺติเก.

๑๐๘. ‘‘กิเลสา ฌาปิตา มยฺหํ…เป… วิหรามิ อนาสวา.

๑๐๙. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๑๑๐. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ สิงฺคาลมาตา ภิกฺขุนี อิมา คาถาโย อภาสิตฺถาติ.

สิงฺคาลมาตุเถริยาปทานํ จตุตฺถํ.