๒. จตุราสีติภิกฺขุนีสหสฺสอปทานํ

๑๓. ‘‘จุลฺลาสีติสหสฺสานิ, พฺราหฺมญฺญกุลสมฺภวา [พฺราหฺมณกุลสมฺภวา (สฺยา. ก.)];

สุขุมาลหตฺถปาทา, ปุเร ตุยฺหํ มหามุเน.

๑๔. ‘‘เวสฺสสุทฺทกุเล ชาตา, เทวา นาคา จ กินฺนรา;

จาตุทฺทีปา พหู กญฺญา, ปุเร ตุยฺหํ มหามุเน.

๑๕. ‘‘กาจิ ปพฺพชิตา อตฺถิ, สพฺพทสฺสาวิโน [สจฺจทสฺสาวิโน (สี. ปี.)] หู;

เทวา จ กินฺนรา นาคา, ผุสิสฺสนฺติ อนาคเต.

๑๖. ‘‘อนุโภตฺวา ยสํ สพฺพํ, ปตฺวาน สพฺพสมฺปทา;

ตุมฺหํ [ตฺวยิ (สี. ปี.)] ปสาทํ ปฏิลทฺธา, พุชฺฌิสฺสนฺติ อนาคเต.

๑๗. ‘‘อเมฺห พฺราหฺมณธีตา ตุ, พฺราหฺมญฺญกุลสมฺภวา;

เปกฺขโต โน [ลกฺขณา จ (สฺยา.)] มหาวีร, ปาเท วนฺทาม จกฺขุม.

๑๘. ‘‘อุปหตา ภวา สพฺเพ, มูลตณฺหา สมูหตา;

สมุจฺฉินฺนา อนุสยา, ปุญฺญสงฺขารทาลิตา.

๑๙. ‘‘สมาธิโคจรา สพฺพา, สมาปตฺติวสี กตา;

ฌาเนน ธมฺมรติยา, วิหริสฺสาม โน สทา.

๒๐. ‘‘ภวเนตฺติ อวิชฺชา จ, สงฺขาราปิ จ เขปิตา;

สุทุทฺทสํ ปทํ คนฺตฺวา, อนุชานาถ [อนุชานิมฺห (สฺยา. ปี. ก.)] นายก.

๒๑. ‘‘อุปการา มมํ ตุเมฺห, ทีฆรตฺตํ กตาวิโน;

จตุนฺนํ สํสยํ เฉตฺวา, สพฺพา คจฺฉนฺตุ นิพฺพุตึ.

๒๒. ‘‘วนฺทิตฺวา มุนิโน ปาเท, กตฺวา อิทฺธิวิกุพฺพนํ;

กาจิ ทสฺเสนฺติ อาโลกํ, อนฺธการมถาปรา.

๒๓. ‘‘ทสฺเสนฺติ จนฺทสูริเย, สาครญฺจ สมจฺฉกํ;

สิเนรุํ ปริภณฺฑญฺจ, ทสฺเสนฺติ ปาริฉตฺตกํ.

๒๔. ‘‘ตาวตึสญฺจ ภวนํ, ยามํ ทสฺเสนฺติ อิทฺธิยา;

ตุสิตํ นิมฺมิเต เทเว, วสวตฺตี มหิสฺสเร.

๒๕. ‘‘พฺรหฺมาโน กาจิ ทสฺเสนฺติ, จงฺกมญฺจ มหารหํ;

พฺรหฺมวณฺณญฺจ มาเปตฺวา, ธมฺมํ เทเสนฺติ สุญฺญตํ.

๒๖. ‘‘นานาวิกุพฺพนํ กตฺวา, อิทฺธึ ทสฺสิย สตฺถุโน;

ทสฺสยึสุ พลํ สพฺพา, ปาเท วนฺทึสุ สตฺถุโน.

๒๗. ‘‘อิทฺธีสุ จ วสี โหม, ทิพฺพาย โสตธาตุยา;

เจโตปริยญาณสฺส, วสี โหม มหามุเน.

๒๘. ‘‘ปุพฺเพนิวาสํ ชานาม, ทิพฺพจกฺขุ วิโสธิตํ;

สพฺพาสวปริกฺขีณา, นตฺถิ ทานิ ปุนพฺภโว.

๒๙. ‘‘อตฺถธมฺมนิรุตฺตีสุ, ปฏิภาเน ตเถว จ;

ญาณํ อมฺหํ มหาวีร, อุปฺปนฺนํ ตว สนฺติเก.

๓๐. ‘‘ปุพฺพานํ โลกนาถานํ, สงฺคมํ โน นิทสฺสิตํ;

อธิการํ พหุํ อมฺหํ, ตุยฺหตฺถาย มหามุเน.

๓๑. ‘‘ยํ อเมฺหหิ กตํ กมฺมํ, กุสลํ สร ตํ มุเน;

ตุยฺหตฺถาย มหาวีร, ปุญฺญานุปจิตานิ โน.

๓๒. ‘‘สตสหสฺสิโต กปฺเป, ปทุมุตฺตโร มหามุนิ;

ปุรํ หํสวตี นาม, สมฺพุทฺธสฺส กุลาสยํ.

๓๓. ‘‘ทฺวาเรน หํสวติยา, คงฺคา สนฺทติ สพฺพทา;

อุพฺพฬฺหา นทิยา ภิกฺขู, คมนํ น ลภนฺติ เต.

๓๔. ‘‘ทิวสํ เทฺว ตโย เจว, สตฺตาหํ มาสิกํ ตโต;

จตุมาสมฺปิ สมฺปุณฺณํ, คมนํ น ลภนฺติ เต.

๓๕. ‘‘ตทา อหุ สตฺตสาโร, ชฏิโล นาม รฏฺฐิโก;

โอรุทฺเธ [โอรตีเร (สฺยา.)] ภิกฺขโว ทิสฺวา, เสตุํ คงฺคาย การยิ.

๓๖. ‘‘ตทา สตสหสฺเสหิ, เสตุํ คงฺคาย การยิ;

สงฺฆสฺส โอริเม ตีเร, วิหารญฺจ อการยิ.

๓๗. ‘‘อิตฺถิโย ปุริสา เจว, อุจฺจนีจกุลานิ จ;

ตสฺส เสตุํ วิหารญฺจ [เตสุ เสตุวิหาเรสุ (สี.), ตสฺส เสตู วิหาเร จ (ปี.)], สมภาคํ อกํสุ เต.

๓๘. ‘‘อเมฺห อญฺเญ จ มานุชา, วิปฺปสนฺเนน เจตสา;

ตสฺส ธมฺเมสุ ทายาทา, นคเร ชนปเทสุ จ.

๓๙. ‘‘อิตฺถี ปุมา กุมารา จ, พหู เจว กุมาริกา;

เสตุโน จ วิหารสฺส, วาลุกา อากิรึสุ เต.

๔๐. ‘‘วีถึ สมฺมชฺชนํ กตฺวา, กทลีปุณฺณฆเฏ ธเช;

ธูปํ จุณฺณญฺจ มาลญฺจ, การํ กตฺวาน สตฺถุโน.

๔๑. ‘‘เสตุวิหาเร กาเรตฺวา, นิมนฺเตตฺวา วินายกํ;

มหาทานํ ททิตฺวาน, สมฺโพธึ อภิปตฺถยึ.

๔๒. ‘‘ปทุมุตฺตโร มหาวีโร, ตารโก สพฺพปาณินํ;

อนุโมทนียํกาสิ, ชฏิลสฺส มหามุนิ [กตฺวา, วิยากาสิ มหามุนิ (สฺยา.)].

๔๓. ‘‘‘สตสหสฺสาติกฺกนฺเต, กปฺโป เหสฺสติ ภทฺทโก;

ภวาภเวนุโภตฺวาน, ปาปุณิสฺสติ โพธิยํ.

๔๔. ‘‘‘กาจิ หตฺถปริกมฺมํ, กตาวี นรนาริโย;

อนาคตมฺหิ อทฺธาเน, สพฺพา เหสฺสนฺติ สมฺมุขา’.

๔๕. ‘‘เตน กมฺมวิปาเกน, เจตนาปณิธีหิ จ;

อุปฺปนฺนา เทวภวนํ, ตุยฺหํ ตา ปริจาริกา.

๔๖. ‘‘ทิพฺพสุขํ อสงฺขิยํ, มานุสญฺจ อสงฺขิยํ;

ตุยฺหํ เต ปริจาเรม, สํสริมฺห ภวาภเว.

๔๗. ‘‘สตสหสฺสิโต กปฺเป, สุกตํ กมฺมสมฺปทํ;

สุขุมาลี มนุสฺสานํ, อโถ เทวปุเร วเร.

๔๘. ‘‘รูปโภคยเส เจว, อโถ กิตฺติญฺจ สกฺกตํ [กิตฺติสุขํ ปิยํ (สฺยา.)];

ลภาม สตตํ สพฺพํ, สุกตํ กมฺมสมฺปทํ.

๔๙. ‘‘ปจฺฉิเม ภเว สมฺปตฺเต, ชาตามฺห พฺราหฺมเณ กุเล;

สุขุมาลหตฺถปาทา, สกฺยปุตฺตนิเวสเน.

๕๐. ‘‘สพฺพกาลมฺปิ ปถวึ, น ปสฺสาม น ลงฺกตํ;

จิกฺขลฺลภูมิมสุจึ [จิกฺขลฺลํ ภูมึ คมนํ (สฺยา.)], น ปสฺสาม มหามุเน.

๕๑. ‘‘อคารํ วสนฺเต อเมฺห, สกฺการํ สพฺพกาลิกํ;

อุปเนนฺติ สทา สพฺพํ, ปุพฺพกมฺมผเลน โน [ปุพฺพกมฺมผลํ ตโต (สี. ปี.)].

๕๒. ‘‘อคารํ ปชหิตฺวาน, ปพฺพชิตฺวานคาริยํ;

สํสารปถนิตฺถิณฺณา, วีตราคา ภวามเส [นตฺถิ ทานิ ปุนพฺภโว (สี. สฺยา. ปี.)].

๕๓. ‘‘จีวรํ ปิณฺฑปาตญฺจ, ปจฺจยํ สยนาสนํ;

อุปเนนฺติ สทา อเมฺห, สหสฺสานิ ตโต ตโต.

๕๔. ‘‘กิเลสา ฌาปิตา อมฺหํ…เป… วิหราม อนาสวา.

๕๕. ‘‘สฺวาคตํ วต โน อาสิ…เป… กตํ พุทฺธสฺส สาสนํ.

๕๖. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ จตุราสีติพฺราหฺมณกญฺญาภิกฺขุนีสหสฺสานิ ภควโต สมฺมุขา อิมา คาถาโย อภาสิตฺถาติ.

จตุราสีติภิกฺขุนีสหสฺสาปทานํ ทุติยํ.