๑๐. อุทกทายิกาเถรีอปทานํ

๑๑๖. ‘‘นคเร พนฺธุมติยา, อโหสึ อุทหาริกา;

อุทหาเรน ชีวามิ, เตน โปเสมิ ทารเก.

๑๑๗. ‘‘เทยฺยธมฺโม จ เม นตฺถิ, ปุญฺญกฺเขตฺเต อนุตฺตเร;

โกฏฺฐกํ อุปสงฺกมฺม, อุทกํ ปฏฺฐเปสหํ.

๑๑๘. ‘‘เตน กมฺเมน สุกเตน, ตาวตึสมคจฺฉหํ;

ตตฺถ เม สุกตํ พฺยมฺหํ, อุทหาเรน นิมฺมิตํ.

๑๑๙. ‘‘อจฺฉรานํ สหสฺสสฺส, อหญฺหิ ปวรา ตทา;

ทสฏฺฐาเนหิ ตา สพฺพา, อภิโภมิ สทา อหํ.

๑๒๐. ‘‘ปญฺญาสํ เทวราชูนํ, มเหสิตฺตมการยึ;

วีสติจกฺกวตฺตีนํ, มเหสิตฺตมการยึ.

๑๒๑. ‘‘ทุเว ภเว สํสรามิ, เทวตฺเต อถ มานุเส;

ทุคฺคตึ นาภิชานามิ, ทกทานสฺสิทํ ผลํ.

๑๒๒. ‘‘ปพฺพตคฺเค ทุมคฺเค วา, อนฺตลิกฺเข จ ภูมิยํ;

ยทา อุทกมิจฺฉามิ, ขิปฺปํ ปฏิลภามหํ.

๑๒๓. ‘‘อวุฏฺฐิกา ทิสา นตฺถิ, สนฺตตฺตา กุถิตาปิ [สนฺตตฺตา กุถิตา น จ (สี. ปี.), สนฺตตฺตา ขุปฺปิตา หิ เม (สฺยา.)] จ;

มม สงฺกปฺปมญฺญาย, มหาเมโฆ ปวสฺสติ.

๑๒๔. ‘‘กทาจิ นียมานาย, ญาติสงฺเฆน เม ตทา;

ยทา อิจฺฉามหํ วสฺสํ, มหาเมโฆ อชายถ.

๑๒๕. ‘‘อุณฺหํ วา ปริฬาโห วา, สรีเร เม น วิชฺชติ;

กาเย จ เม รโช นตฺถิ, ทกทานสฺสิทํ ผลํ.

๑๒๖. ‘‘วิสุทฺธมนสา อชฺช, อเปตมนปาปิกา;

สพฺพาสวปริกฺขีณา, นตฺถิ ทานิ ปุนพฺภโว.

๑๒๗. ‘‘เอกนวุติโต กปฺเป, ยํ ทกํ อททึ ตทา;

ทุคฺคตึ นาภิชานามิ, ทกทานสฺสิทํ ผลํ.

๑๒๘. ‘‘กิเลสา ฌาปิตา มยฺหํ…เป… วิหรามิ อนาสวา.

๑๒๙. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๑๓๐. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อุทกทายิกา ภิกฺขุนี อิมา คาถาโย อภาสิตฺถาติ.

อุทกทายิกาเถริยาปทานํ ทสมํ.

สุเมธาวคฺโค ปฐโม.