๕. ปญฺจมวคฺโค

๑. กุมารกสฺสปตฺเถรคาถา

๒๐๑. ‘‘อโห พุทฺธา อโห ธมฺมา, อโห โน สตฺถุ สมฺปทา;

ยตฺถ เอตาทิสํ ธมฺมํ, สาวโก สจฺฉิกาหิ’’ติ.

๒๐๒. ‘‘อสงฺเขยฺเยสุ กปฺเปสุ, สกฺกายาธิคตา อหู;

เตสมยํ ปจฺฉิมโก, จริโมยํ สมุสฺสโย;

ชาติมรณสํสาโร, นตฺถิ ทานิ ปุนพฺภโว’’ติ.

… กุมารกสฺสโป เถโร….

๒. ธมฺมปาลตฺเถรคาถา

๒๐๓. ‘‘โย หเว ทหโร ภิกฺขุ, ยุญฺชติ พุทฺธสาสเน;

ชาคโร ส หิ สุตฺเตสุ [ปติสุตฺเตสุ (สี. ก.)], อโมฆํ ตสฺส ชีวิตํ.

๒๐๔. ‘‘ตสฺมา สทฺธญฺจ สีลญฺจ, ปสาทํ ธมฺมทสฺสนํ;

อนุยุญฺเชถ เมธาวี, สรํ พุทฺธาน สาสน’’นฺติ.

… ธมฺมปาโล เถโร….

๓. พฺรหฺมาลิตฺเถรคาถา

๒๐๕. ‘‘กสฺสินฺทฺริยานิ สมถงฺคตานิ, อสฺสา ยถา สารถินา สุทนฺตา;

ปหีนมานสฺส อนาสวสฺส, เทวาปิ กสฺส [ตสฺส (พหูสุ)] ปิหยนฺติ ตาทิโน’’ติ.

๒๐๖. [ธ. ป. ๙๔ ธมฺมปเทปิ] ‘‘มยฺหินฺทฺริยานิ สมถงฺคตานิ, อสฺสา ยถา สารถินา สุทนฺตา;

ปหีนมานสฺส อนาสวสฺส, เทวาปิ มยฺหํ ปิหยนฺติ ตาทิโน’’ติ.

… พฺรหฺมาลิ เถโร….

๔. โมฆราชตฺเถรคาถา

๒๐๗. ‘‘ฉวิปาปก จิตฺตภทฺทก, โมฆราช สตตํ สมาหิโต;

เหมนฺติกสีตกาลรตฺติโย [เหมนฺติกกาลรตฺติโย (ก.)], ภิกฺขุ ตฺวํสิ กถํ กริสฺสสิ’’.

๒๐๘. ‘‘สมฺปนฺนสสฺสา มคธา, เกวลา อิติ เม สุตํ;

ปลาลจฺฉนฺนโก เสยฺยํ, ยถญฺเญ สุขชีวิโน’’ติ.

… โมฆราชา เถโร….

๕. วิสาขปญฺจาลปุตฺตตฺเถรคาถา

๒๐๙. ‘‘น อุกฺขิเป โน จ ปริกฺขิเป ปเร, โอกฺขิเป ปารคตํ น เอรเย;

น จตฺตวณฺณํ ปริสาสุ พฺยาหเร, อนุทฺธโต สมฺมิตภาณิ สุพฺพโต.

๒๑๐. ‘‘สุสุขุมนิปุณตฺถทสฺสินา, มติกุสเลน นิวาตวุตฺตินา;

สํเสวิตวุทฺธสีลินา, นิพฺพานํ น หิ เตน ทุลฺลภ’’นฺติ.

… วิสาโข ปญฺจาลปุตฺโต เถโร ….

๖. จูฬกตฺเถรคาถา

๒๑๑. ‘‘นทนฺติ โมรา สุสิขา สุเปขุณา, สุนีลคีวา สุมุขา สุคชฺชิโน;

สุสทฺทลา จาปิ มหามหี อยํ, สุพฺยาปิตมฺพุ สุวลาหกํ นภํ.

๒๑๒. ‘‘สุกลฺลรูโป สุมนสฺส ฌายตํ [ฌายิตํ (สฺยา. ก.)], สุนิกฺกโม สาธุ สุพุทฺธสาสเน;

สุสุกฺกสุกฺกํ นิปุณํ สุทุทฺทสํ, ผุสาหิ ตํ อุตฺตมมจฺจุตํ ปท’’นฺติ.

… จูฬโก [จูลโก (สี. อฏฺฐ.)] เถโร….

๗. อนูปมตฺเถรคาถา

๒๑๓. ‘‘นนฺทมานาคตํ จิตฺตํ, สูลมาโรปมานกํ;

เตน เตเนว วชสิ, เยน สูลํ กลิงฺครํ.

๒๑๔. ‘‘ตาหํ จิตฺตกลึ พฺรูมิ, ตํ พฺรูมิ จิตฺตทุพฺภกํ;

สตฺถา เต ทุลฺลโภ ลทฺโธ, มานตฺเถ มํ นิโยชยี’’ติ.

… อนูปโม เถโร….

๘. วชฺชิตตฺเถรคาถา

๒๑๕. ‘‘สํสรํ ทีฆมทฺธานํ, คตีสุ ปริวตฺติสํ;

อปสฺสํ อริยสจฺจานิ, อนฺธภูโต [อนฺธีภูโต (ก.)] ปุถุชฺชโน.

๒๑๖. ‘‘ตสฺส เม อปฺปมตฺตสฺส, สํสารา วินฬีกตา;

สพฺพา คตี สมุจฺฉินฺนา, นตฺถิ ทานิ ปุนพฺภโว’’ติ.

… วชฺชิโต เถโร….

๙. สนฺธิตตฺเถรคาถา

๒๑๗. ‘‘อสฺสตฺเถ หริโตภาเส, สํวิรูฬฺหมฺหิ ปาทเป;

เอกํ พุทฺธคตํ สญฺญํ, อลภิตฺถํ [อลภึ หํ (ก.)] ปติสฺสโต.

๒๑๘. ‘‘เอกตึเส อิโต กปฺเป, ยํ สญฺญมลภึ ตทา;

ตสฺสา สญฺญาย วาหสา, ปตฺโต เม อาสวกฺขโย’’ติ.

… สนฺธิโต เถโร….

วคฺโค ปญฺจโม นิฏฺฐิโต.

ตสฺสุทฺทานํ –

กุมารกสฺสโป เถโร, ธมฺมปาโล จ พฺรหฺมาลิ;

โมฆราชา วิสาโข จ, จูฬโก จ อนูปโม;

วชฺชิโต สนฺธิโต เถโร, กิเลสรชวาหโนติ.

ทุกนิปาโต นิฏฺฐิโต.