๓. ตติยวคฺโค

๑. อุตฺตรตฺเถรคาถา

๑๖๑. ‘‘ขนฺธา มยา ปริญฺญาตา, ตณฺหา เม สุสมูหตา;

ภาวิตา มม โพชฺฌงฺคา, ปตฺโต เม อาสวกฺขโย.

๑๖๒. ‘‘โสหํ ขนฺเธ ปริญฺญาย, อพฺพหิตฺวาน [อพฺพุหิตฺวาน (ก.)] ชาลินึ;

ภาวยิตฺวาน โพชฺฌงฺเค, นิพฺพายิสฺสํ อนาสโว’’ติ.

… อุตฺตโร เถโร….

๒. ภทฺทชิตฺเถรคาถา

๑๖๓. ‘‘ปนาโท นาม โส ราชา, ยสฺส ยูโป สุวณฺณโย;

ติริยํ โสฬสุพฺเพโธ [โสฬสปพฺเพโธ (สี. อฏฺฐ.), โสฬสพฺพาโณ (?)], อุพฺภมาหุ [อุทฺธมาหุ (สี.), อุจฺจมาหุ (สฺยา.)] สหสฺสธา.

๑๖๔. ‘‘สหสฺสกณฺโฑ สตเคณฺฑุ, ธชาลุ หริตามโย;

อนจฺจุํ ตตฺถ คนฺธพฺพา, ฉสหสฺสานิ สตฺตธา’’ติ.

… ภทฺทชิตฺเถโร….

๓. โสภิตตฺเถรคาถา

๑๖๕. ‘‘สติมา ปญฺญวา ภิกฺขุ, อารทฺธพลวีริโย;

ปญฺจ กปฺปสตานาหํ, เอกรตฺตึ อนุสฺสรึ.

๑๖๖. ‘‘จตฺตาโร สติปฏฺฐาเน, สตฺต อฏฺฐ จ ภาวยํ;

ปญฺจ กปฺปสตานาหํ, เอกรตฺตึ อนุสฺสริ’’นฺติ.

… โสภิโต เถโร….

๔. วลฺลิยตฺเถรคาถา

๑๖๗. ‘‘ยํ กิจฺจํ ทฬฺหวีริเยน, ยํ กิจฺจํ โพทฺธุมิจฺฉตา;

กริสฺสํ นาวรชฺฌิสฺสํ [นาวรุชฺฌิสฺสํ (ก. สี. ก.)], ปสฺส วีริยํ ปรกฺกม.

๑๖๘. ‘‘ตฺวญฺจ เม มคฺคมกฺขาหิ, อญฺชสํ อมโตคธํ;

อหํ โมเนน โมนิสฺสํ, คงฺคาโสโตว สาคร’’นฺติ.

… วลฺลิโย เถโร….

๕. วีตโสกตฺเถรคาถา

๑๖๙. ‘‘เกเส เม โอลิขิสฺสนฺติ, กปฺปโก อุปสงฺกมิ;

ตโต อาทาสมาทาย, สรีรํ ปจฺจเวกฺขิสํ.

๑๗๐. ‘‘ตุจฺโฉ กาโย อทิสฺสิตฺถ, อนฺธกาโร ตโม พฺยคา;

สพฺเพ โจฬา สมุจฺฉินฺนา, นตฺถิ ทานิ ปุนพฺภโว’’ติ.

… วีตโสโก เถโร….

๖. ปุณฺณมาสตฺเถรคาถา

๑๗๑. ‘‘ปญฺจ นีวรเณ หิตฺวา, โยคกฺเขมสฺส ปตฺติยา;

ธมฺมาทาสํ คเหตฺวาน, ญาณทสฺสนมตฺตโน.

๑๗๒. ‘‘ปจฺจเวกฺขึ อิมํ กายํ, สพฺพํ สนฺตรพาหิรํ;

อชฺฌตฺตญฺจ พหิทฺธา จ, ตุจฺโฉ กาโย อทิสฺสถา’’ติ.

… ปุณฺณมาโส เถโร….

๗. นนฺทกตฺเถรคาถา

๑๗๓. ‘‘ยถาปิ ภทฺโท อาชญฺโญ, ขลิตฺวา ปติติฏฺฐติ;

ภิยฺโย ลทฺทาน สํเวคํ, อทีโน วหเต ธุรํ.

๑๗๔. ‘‘เอวํ ทสฺสนสมฺปนฺนํ, สมฺมาสมฺพุทฺธสาวกํ;

อาชานียํ มํ ธาเรถ, ปุตฺตํ พุทฺธสฺส โอรส’’นฺติ.

… นนฺทโก เถโร….

๘. ภรตตฺเถรคาถา

๑๗๕. ‘‘เอหิ นนฺทก คจฺฉาม, อุปชฺฌายสฺส สนฺติกํ;

สีหนาทํ นทิสฺสาม, พุทฺธเสฏฺฐสฺส สมฺมุขา.

๑๗๖. ‘‘ยาย โน อนุกมฺปาย, อเมฺห ปพฺพาชยี มุนิ;

โส โน อตฺโถ อนุปฺปตฺโต, สพฺพสํโยชนกฺขโย’’ติ.

… ภรโต เถโร….

๙. ภารทฺวาชตฺเถรคาถา

๑๗๗. ‘‘นทนฺติ เอวํ สปฺปญฺญา, สีหาว คิริคพฺภเร;

วีรา วิชิตสงฺคามา, เชตฺวา มารํ สวาหนึ [สวาหนํ (พหูสุ)].

๑๗๘. ‘‘สตฺถา จ ปริจิณฺโณ เม, ธมฺโม สงฺโฆ จ ปูชิโต;

อหญฺจ วิตฺโต สุมโน, ปุตฺตํ ทิสฺวา อนาสว’’นฺติ.

… ภารทฺวาโช เถโร….

๑๐. กณฺหทินฺนตฺเถรคาถา

๑๗๙. ‘‘อุปาสิตา สปฺปุริสา, สุตา ธมฺมา อภิณฺหโส;

สุตฺวาน ปฏิปชฺชิสฺสํ, อญฺชสํ อมโตคธํ.

๑๘๐. ‘‘ภวราคหตสฺส เม สโต, ภวราโค ปุน เม น วิชฺชติ;

น จาหุ น จ เม ภวิสฺสติ, น จ เม เอตรหิ วิชฺชตี’’ติ.

… กณฺหทินฺโน เถโร….

วคฺโค ตติโย นิฏฺฐิโต.

ตสฺสุทฺทานํ –

อุตฺตโร ภทฺทชิตฺเถโร, โสภิโต วลฺลิโย อิสิ;

วีตโสโก จ โย เถโร, ปุณฺณมาโส จ นนฺทโก;

ภรโต ภารทฺวาโช จ, กณฺหทินฺโน มหามุนีติ.