๑๐. สิริมตฺเถรคาถา

๑๕๙. ‘‘ปเร จ นํ ปสํสนฺติ, อตฺตา เจ อสมาหิโต;

โมฆํ ปเร ปสํสนฺติ, อตฺตา หิ อสมาหิโต.

๑๖๐. ‘‘ปเร จ นํ ครหนฺติ, อตฺตา เจ สุสมาหิโต;

โมฆํ ปเร ครหนฺติ, อตฺตา หิ สุสมาหิโต’’ติ.

… สิริมา เถโร….

วคฺโค ทุติโย นิฏฺฐิโต.

ตสฺสุทฺทานํ –

จุนฺโท จ โชติทาโส จ, เถโร เหรญฺญกานิ จ;

โสมมิตฺโต สพฺพมิตฺโต, กาโล ติสฺโส จ กิมิโล [กิมฺพิโล (สี. สฺยา. ปี.), ฉนฺทลกฺขณานุโลมํ];

นนฺโท จ สิริมา เจว, ทส เถรา มหิทฺธิกาติ.